Казахстан прымае ад Індыі старшынства ў ШАС. «Паступальнае пашырэнне ШАС сведчыць аб няўхільна ўзрастаючай ролі і ўсё большай прывабнасці нашага шматпланавага ўзаемавыгаднага супрацоўніцтва, — адзначыў Прэзідэнт Казахстана. — Настаў час для прыняцця новай стратэгіі развіцця ШАС. Казахстан распрацаваў праект дакумента і плануе прадставіць яго ў рамках свайго старшынства».

Касым-Жамарт Такаеў падкрэсліў важнасць дыстанцыявацца ад праблем двухбаковага характару, паколькі ШАС павінна асацыіравацца са ўзаемаразуменнем і супрацоўніцтвам.

Прэзідэнт Казахстана павіншаваў Іран з набыццём паўнапраўнага членства і адзначыў, што набліжаецца да завяршэння працэс уступлення ў ШАС Беларусі. Карыстаючыся магчымасцю, казахстанскі лідар асабіста павіншаваў Прэзідэнта Беларусі з Днём Незалежнасці, які Беларусь адзначыла напярэдадні.

«ШАС можа ўнесці важкі ўклад у дасягненне Мэт устойлівага развіцця і пераадоленне сучасных выклікаў чалавецтва», — падкрэсліў Касым-Жамарт Такаеў.

Ён канстатаваў беспрэцэдэнтны рост геапалітычнай напружанасці, узмацненне гандлёвых і санкцыйных войнаў і шэрага іншых выклікаў. Таму неабходна захоўваць прыхільнасць да фармавання больш прадстаўнічага, дэмакратычнага і шматпалярнага свету пры каардынуючай ролі ААН.

Прэзідэнт Казахстана прадставіў прыярытэты, якія будуць мець стратэгічнае значэнне для далейшага развіцця ШАС.

Першае — забеспячэнне бяспекі і стабільнасці на прасторы арганізацыі. Касым-Жамарт Такаеў падкрэсліў важнасць не дапусціць геапалітычнага разлому паміж усходам і захадам. ШАС павінна прапанаваць сваё бачанне ўстойлівага свету. У ходзе свайго старшынства Казахстан прадставіць ініцыятыву аб сусветным адзінстве за справядлівы свет і згоду. Таксама ў фокусе ўвагі будуць барацьба з транснацыянальнай злачыннасцю, кіберзлачынствамі, незаконным абаротам наркотыкаў, тэрарызмам і экстрэмізмам.

Другі прыярытэт — пашырэнне гандлёва-эканамічных сувязей. Касым-Жамарт Такаеў прапанаваў даручыць Савету кіраўнікоў урадаў разгледзець магчымасць стварэння сумеснага інвестыцыйнага фонду, выказаўся за стымуляванне прамых і партфельных інвестыцый.

«Эканамічны парадак дня ШАС павінен быць сфакусаваны на стварэнні спрыяльных умоў для павелічэння ўзаемнага тавараабароту, зняцці існуючых гандлёвых бар’ераў, запуску сумесных прадпрыемстваў», — лічыць казахстанскі лідар.

Ён таксама прапанаваў стварыць базу эканамічных прэферэнцый у ШАС для павышэння інвестыцыйнай прывабнасці арганізацыі.

У ліку іншых прыярытэтаў — развіццё транзітна-транспартнага патэнцыялу і супрацоўніцтва ў лагістыцы, умацаванне энергетычнага супрацоўніцтва, пашырэнне ўзаемадзеяння ў лічбавай сферы і работа над ліквідацыяй лічбавай няроўнасці паміж рознымі краінамі і сацыяльнымі групамі, умацаванне ўзаемадзеяння ў пытаннях экалогіі, развіццё культурна-гуманітарных сувязей, турызму.

Звязда, 4 ліпеня 2023