Беларускі лідар Аляксандр Лукашэнка павіншаваў французскі народ з нацыянальным святам – Днём узяцця Бастыліі, паведамілі ў прэс-службе прэзідэнта.

Кіраўнік дзяржавы адзначыў у сваім віншаванні, што на працягу доўгіх гадоў народы Беларусі і Францыі шмат аб’ядноўвае, гэта "шматлікія падзеі агульнага мінулага, падобныя каштоўнасці і рысы нацыянальнага характару".

Усе гэтыя гады, паводле слоў Лукашэнкі, беларусы і французы развівалі не толькі чалавечыя кантакты і сяброўства, але і наладжвалі дзелавыя адносіны.

"На жаль, сёння шчырае імкненне беларусаў і французаў супрацоўнічаць, спазнаваць гісторыю і культуру адзін аднаго натыкаецца на штучныя перашкоды і забароны, якія дыктуе еўрапейская палітычная кан’юнктура", - дадаў прэзідэнт.

Лукашэнка ад імя беларускага народа і сябе асабіста пажадаў французам шчасця, дабрабыту і мірнай стваральнай будучыні.

Кожны год 14 ліпеня Французская Рэспубліка святкуе Дзень узяцця Бастыліі. Менавіта ў гэты дзень у 1789 годзе ўдзельнікі Вялікай французскай рэвалюцыі штурмам узялі крэпасць-турму Бастылію, якая з’яўлялася сімвалам каралеўскага дэспатызму. Свята было афіцыйна ўстаноўлена яшчэ ў 1880 годзе.

Традыцыйна афіцыйная праграма святкавання пачынаецца напярэдадні з баляў. У сам Дзень узяцця Бастыліі праводзіцца ваенны парад на Елісейскіх палях. Французы па ўсёй краіне шырока адзначаюць свята і ладзяць шумныя вечарыны ў барах і рэстаранах.

Мінск, 14 ліпеня 2023
Sputnik