Ужо ў гэтым месяцы ў Башкортастан плануюць прывезці першую партыю беларускіх зуброў, другую – у пачатку восені, паведаміў  прадстаўнік Башкортастана пры расійскім гандлёвым прадстаўніцтве ў Беларусі Канстанцін Клімін.

"Праведзена вялікая работа, падрыхтавана ўся дакументацыя па патрабаваных нормах утрымання чырвонакніжных жывёл. Навуковая супольнасць падрыхтавала план дзеянняў, якім чынам можна было б адаптаваць папуляцыю беларускіх зуброў у Башкортастане. Таксама выбрана месца – гэта Мурадымаўская цясніна", - расказаў Клімін.

Ён адзначыў, што ў траўні завязуць у рэспубліку пяць асобін зуброў, а ў верасні – трынаццаць. Расійскі бок таксама разлічвае, што далейшае скрыжаванне дапаможа дадаткова вывесці той від, які будзе больш адаптыўны да ўмоў сярэдняй паласы Расіі.

Нагадаем, Беларусь пагадзілася перадаць Башкортастану некалькі асобін зуброў у сярэдзіне студзеня, калі ў Мінск з візітам прыязджаў кіраўнік гэтага рэгіёна Радый Хабіраў.

Пазней Хабіраў расказаў, што размова аб зубрах "цалкам выпадкова зайшла ў кіраўніцтве справамі прэзідэнта".

"Мы прапанавалі нейкую частку асобін, адпаведна, узяць на развіццё, на прыплод у Башкортастан", - растлумачыў ён.

Аказалася, што гэта магчыма. Напрыклад, зуброў ужо адпраўлялі ў Калужскую вобласць. Папярэднія кансультацыі паказалі, што башкірскія ўмовы падыходзяць беларускім волатам.

Міск, 17 траўня 2023
Sputnik