Беларускі і армянскі народы аб’ядноўваюць даўнія дружалюбныя сувязі, беларускія ўлады робяць усё, каб армянская дыяспара ў рэспубліцы квітнела, заявіў міністр замежных спраў Беларусі Максім Рыжанкоў.

Кіраўнік МЗС і старшыня Мінгарвыканкама Уладзімір Кухараў у пятніцу сустрэліся з прадстаўнікамі армянскай дыяспары, паглядзелі, як ідзе будаўніцтва армянскай царквы ў Мінску.

"Апошнім часам былі нейкія размовы пра армяна-беларускія адносіны. Нейкія палітыкі, у першую чаргу з армянскага боку, папракалі ў нечым беларускі бок. Хачу сказаць: усюды і заўсёды меркай любых адносін з’яўляюцца канкрэтныя дзеянні і канкрэтныя рашэнні", - заявіў Рыжанкоў.

Паводле яго слоў, пэўным сімвалам таго, як развіваецца ўзаемадзеянне беларускага і армянскага народаў, з’яўляецца будаўніцтва армянскай царквы ў Мінску, якая стане для дыяспары цэнтрам культурнага і рэлігійнага жыцця.

"Гэта якраз адзін з тых праектаў, які дэманструе рэальныя адносіны паміж беларускім і армянскім народамі, адносіны да дружалюбнага армянскага народа з боку мінскіх гарадскіх улад, з боку кіраўніка беларускай дзяржавы", - адзначыў міністр.

Паводле яго слоў, армянская дыяспара ў Беларусі патрыятычна настроена да сваёй другой радзімы, уносіць свой уклад у развіццё і працвітанне рэспублікі.

"Мы ў сваю чаргу робім усё, каб армянская дыяспара ў Беларусі квітнела, магла рэалізоўваць любыя свае імкненні – культурныя, адукацыйныя, сацыяльныя, эканамічныя. І не ў чым не мела патрэбы, калі гэта датычыцца развіцця армянскага духу", - падкрэсліў Рыжанкоў.

Паводле яго слоў, прыкладам гэтага з’яўляецца цудоўны будынак армянскай апостальскай царквы, які стане ўпрыгажэннем Мінска, а для армян, якія пражываюць не толькі ў сталіцы, але і ва ўсёй Беларусі, – знакавым рэлігійным і культурным цэнтрам.

Кіраўнік МЗС асабліва адзначыў, што побач з храмам стаіць адукацыйны цэнтр, дзе плануецца і адкрыццё нядзельнай школы для армянскіх дзяцей.

"Усё гэта пойдзе на карысць беларуска-армянскай дружбы і дэманструе нашае стаўленне да армянскага народа, які пражывае на тэрыторыі Беларусі", - адзначыў ён.

На сустрэчы Рыжанкова і Кухарава з прадстаўнікамі армянскай дыяспары вялася размова аб даўніх культурных, гістарычных сувязях, якія аб’ядноўваюць народы дзвюх краін. Асаблівы акцэнт у размове быў зроблены на гістарычнай памяці: як беларусы і армяне разам пралівалі кроў падчас Вялікай Айчыннай вайны.

Як расказалі прадстаўнікі армянскай дыяспары, якія прысутнічалі на сустрэчы, узвядзенне царквы ў Мінску на вуліцы Філімонава было распачата летам 2022 года. Яна будуецца з армянскага чырвонага вулканічнага каменя – туфу, які быў спецыяльна дастаўлены ў Беларусь. На будоўлі працуюць армянскія будаўнікі, аформілі сцены храма і напісалі іконы таксама лепшыя майстры з Арменіі.

Работы ўжо набліжаюцца да завяршэння. Плануецца, што царкву адкрыюць восенню бягучага года.

Мінск, 6 верасня 2024
Sputnik