«Пацвярджаем атрыманне ноты пасольства Польшчы ў Беларусі адносна нібыта факту парушэння 1 жніўня 2023 года паветранай прасторы гэтай краіны двума беларускімі верталётамі. Адзначаем, што перададзеная нота не ўтрымлівае неабвержных доказаў. Дадзеныя аб’ектыўнага кантролю польскі бок не даў. У той жа час адпаведныя заявы беларускага боку па гэтай тэме абапіраліся выключна на дадзеныя аб’ектыўнага кантролю палётаў паветраных судоў», — заявілі ў прэс-службе МЗС.

Больш за тое, польскі бок быў напярэдадні ва ўстаноўленым парадку праінфармаваны аб планаваных палётах верталётаў у прыгранічнай зоне, што таксама пацвярджае адсутнасць якіх-небудзь намераў беларускага боку парушаць паветраную прастору суседняй дзяржавы.

«У чарговы раз заклікаем польскі бок не нагнятаць сітуацыю. Прапануем аднавіць паўнавартасны дыялог паміж ваеннымі ведамствамі дзвюх краін, па лініі якіх як раз і ўхіляюцца падобныя рознагалоссі», — падсумавалі ў МЗС.

Звязда, 5 жніўня 2023