"Белавія" апярэдзіла Lufthansa і KLM у рэйтынгу авіякампаній расійскага Forbes.

"Сэрвіс у расійскім небе, які прадастаўляецца замежнымі кампаніямі, некалькі месяцаў вывучалі эксперты агенцтва "Авіяпорт", а тарыфную палітыку спецыяльна для Forbes прааналізаваў метапошукавік Aviasales. Такім чынам мы параўналі некалькі замежных авіякампаній па суадносінах цана/якасць", - растлумачылі ў часопісе.

Спецыялісты Forbes прызнаюцца, што вынік здзівіў іх саміх - на другім месцы апынуўся беларускі перавозчык "Белавія", уступіўшы толькі авіякампаніі Emirates. Таксама ў тройку ўвайшоў польскі Lot.

Lufthansa, KLM і Air France засталіся ззаду. У часопісе растлумачылі, што для ацэнкі якасці авіякампаній за аснову былі ўзяты вынікі даследавання "Сэрвіс у расійскім небе" агенцтва "Авіяпорт".

Пад выглядам тайных пасажыраў эксперты агенцтва праверылі ўзровень абслугоўвання авіякампаній на ўсіх этапах: ад куплі білета да выхаду з самалёта пасля пералёту. За час даследавання выканана больш як 80 палётаў сумарнай працягласцю больш за 15 сутак.

"Да вынікаў іх назіранняў мы дадалі яшчэ адзін важны сэрвісны складнік - пунктуальнасць (крыніца статыстыкі па расійскіх авіякампаніях - Расавіяцыя, па замежных - flightstats.com)", - расказалі ў Forbes.

Для ацэнкі цэнавай палітыкі расійскі метапошукавік авіябілетаў Aviasales прааналізаваў продажы адабраных авіякампаній за 11 месяцаў 2016 года прыкладна на 500 рэйсаў і па кожным рэйсе вывеў сярэдні чэк аднаго дарослага пасажыра.

"Рэйсы мы разбілі на групы ў залежнасці ад працягласці палёту (12 груп на ўнутраных лініях і 12 груп на міжнародных лініях) і параўналі цэнавую палітыку авіякампаній у кожнай групе", - паведамілі спецыялісты часопіса.

"Белавія" з`яўляецца буйнейшым авіяперавозчыкам Беларусі, ажыццяўляе рэгулярныя рэйсы па 49 маршрутах 27 краін Еўропы, СНД і Азіі.

15 лютага 2017, Мінск
БЕЛТА