Цэнтр плануецца адкрыць на тэрыторыі Хвойніцкага лясніцтва ў 2015—2016 гадах з мэтай "доўгачасовага захавання зубра як біялагічнага віду з максімальна магчымай генетычнай разнастайнасцю". 

25 лютага адбылося грамадскае абмеркаванне справаздачы аб ацэнцы ўздзеяння новага аб`екта на навакольнае асяроддзе. Як адзначылі ў нацпарку , удзельнікаў слуханняў цікавілі пытанні ўплыву будаўніцтва і функцыянавання цэнтра на дрэвастоі на тэрыторыі загонаў для ўтрымання зуброў, захаванасці папуляцыі мядзведжай цыбулі, што расце паблізу запраектаванай агароджы, пагрозы для запаведнай зоны Белавежскай пушчы ў цэлым, а таксама верагоднасць пападання прадуктаў жыццядзейнасці зубра з меліярацыйных каналаў у трансгранічныя з польскім бокам вадацёкі. 

"Прадстаўнікі грамадскасці прыйшлі да высновы, што стварэнне навукова-селекцыйнага цэнтра не акажа значнага ўплыву на стан прыродных комплексаў нацыянальнага парку. Экалагічныя прыярытэты захавання ў доўгатэрміновай перспектыве белавежскага зубра прадвызначаюць мэтазгоднасць выканання гэтага праекта, што будзе спрыяць умацаванню пазітыўнага іміджу Белавежскай пушчы і эфектыўнаму кіраванню папуляцыяй гэтага віду", — гаворыцца ў паведамленні. 

У Беларусі жыве каля 1,2 тыс. зуброў, за апошнія 20 гадоў іх колькасць павялічылася ў 3,5 разу. У 2011 годзе была зацверджана канцэпцыя захавання і ўстойлівага выкарыстання зуброў, якая прадугледжвае стабілізацыю колькасці гэтых жывёл у Беларусі на ўзроўні 1,5 тыс. асобін, развіццё генетычнага патэнцыялу беларускай папуляцыі і падтрыманне стабільнага росту мікрапапуляцый.

Анастасія Салановіч, БелаПАН
Мінск, 9 сакавіка 2015