Прытрымлівацца такой курсавой палітыкі рэкамендаваў камерцыйным банкам Нацыянальны банк на нарадзе 8 студзеня.

Згодна з новымі каціроўкамі, якія банкі ўстанавілі раніцай 9 студзеня, максімальны курс продажу долара склаў у абменных пунктах 14.035 рублёў, што на 2% вышэй за афіцыйны (13.760 рублёў). Курс продажу еўра таксама на 2% адрозніваецца ад афіцыйнага і склаў 16.565 рублёў. 

"Курсавыя абмежаванні маюць рэкамендацыйны характар. Аднак рэкамендацыі Нацбанка, як правіла, выконваюцца пераважнай большасцю банкаў і маюць хутчэй абавязковы да выканання характар", — адзначыў прадстаўнік аднаго з банкаў. 

На думку банкіраў, абмежаванні на ваганні курсаў валют, устаноўленыя рэгулятарам на наяўным рынку, скіраваныя на тое, каб выключыць множнасць курсаў беларускага рубля. 

"З часоў узаемадзеяння Нацбанка з МВФ востра была ўзнятая праблема множнасці курсаў, і тады ў якасці адной з умоў давання фінансавання фонд выставіў такую — недапушчэнне множнасці курсаў рубля. Ваганні курсу ад афіцыйнага ў памеры плюс-мінус 2% — гэта дапушчальны калідор, які не выклікае ў крэдытораў пытанняў адносна множнасці курсаў беларускага рубля", — падкрэсліў прадстаўнік аднаго з банкаў. 

Нагадаем, пасля ўвядзення Нацбанкам 19 снежня 30-працэнтнага валютнага збору ў Беларусі ўтварылася множнасць курсаў рубля. Беларускія бізнес-саюзы ў канцы 2014 года заявілі, што такая сітуацыя адмоўна адбіваецца на дзейнасці прадпрыемстваў, і заклікалі ўжо 1 студзеня правесці афіцыйную дэвальвацыю і вярнуцца да адзінага курсу рубля. 

8 студзеня Нацыянальны банк аб`явіў пра поўную адмену валютнага збору, памер якога з 29 снежня паступова зніжаўся. У выніку прынятых рашэнняў афіцыйны курс долара дасягнуў 13.760 рублёў (18 снежня, да ўвядзення 30-працэнтнага валютнага збору, афіцыйны курс долара складаў 10.880 рублёў). Такім чынам, за апошнія тры тыдні афіцыйны курс долара ў Беларусі вырас на 26,5%.

Дзмітрый Заяц, БелаПАН
Мінск, 9 студзеня 2015