Па дадзеных супрацоўнікаў Сечаноўскага ўніверсітэта, за год спажыванне антыбіётыкаў у краіне вырасла на 30 адсоткаў. Гэта звязваюць з эпідэміяй ковіда, аднак спецыялісты адзначаюць: нават у больш спакойныя часы людзі схільныя прымаць гэтыя прэпараты без прызначэння лекара, напрыклад, пры лёгкай прастудзе ці вірусных інфекцыях, калі гэта практычна бескарысна, а вось здароўю можа нашкодзіць.

Сувязь мікраарганізмаў, якія жывуць у чалавечым кішэчніку, з небяспечнымі захворваннямі даказалі ў канцы 1980-х. Аўстралійскія навукоўцы прадэманстравалі, што бактэрыя Helicobacter pylori — яна жыве ў страўніку ў большасці людзей — можа выклікаць рак пры аслабленым імунітэце. Патаген размнажаецца, узнікае запаленне, і ўтвараецца злаякасная пухліна.

Дамінаванне ў кішэчніку тых ці іншых бактэрый здольна абярнуцца цэлым букетам хвароб — ад сардэчна-сасудзістых, алергіі і атлусцення да псіхічных, парушэнняў памяці і нават дэпрэсіі.

Мікробы трэба берагчы ззамаладу: старацца харчавацца правільна, уважліва сачыць за здароўем і ні ў якім разе не займацца самалячэннем. Перш за ўсё гэта тычыцца бескантрольнага прыёму антыбіётыкаў, якія з лёгкасцю парушаюць мікробную раўнавагу ў страўніку. Часам нават аднаразовае ўжыванне такіх прэпаратаў на гады мяняе мікрабіёту — бо яны дзейнічаюць не толькі на патагены, але і на карысныя бактэрыі.

Даследнікі адзначалі: празмернае захапленне антыбіётыкамі ў лепшым выпадку скончыцца дыярэяй, у горшым — паменшыць устойлівасць усёй мікрабіёмы да патагенаў. У выніку можна зарабіць кішэчную інфекцыю і справакаваць запаленчыя працэсы. Тыя, у сваю чаргу, дадуць штуршок утварэнню злаякасных пухлін.

Звязда, 13 верасня 2021