Гэту выставу пачалі рыхтаваць яшчэ год таму, каб да стагоддзя з дня нараджэння мастака прадставіць на малой радзіме Леаніда Шчамялёва. Яна з`яўляецца працягам цыкла мерапрыемстваў, што праходзяць у бягучым годзе і прымеркаваны да юбілейнай даты.

"Гэта важная падзея, і прадстаўленыя карціны ўпершыню экспануюцца ў Віцебску. Выстава вельмі насычаная, рэтраспектыўная, яна будзе цікава і жыхарам, і гасцям горада. Яны змогуць азнаёміцца з работамі Леаніда Шчамялёва. Нам важна было паказаць розныя перыяды жыцця і творчасці мастака, партрэты яго сям`і , карціны, прысвечаныя ваеннаму часу, - гэта была важная частка яго жыцця, паколькі ён прайшоў Вялікую Айчынную вайну ад пачатку да канца. Пейзажы нашай радзімы, прыроды Беларусі таксама займаюць значнае месца ў творчасці жывапісца, паколькі ён аб`ездзіў Беларусь і адлюстраваў на палатне любімыя куткі", - расказала загадчыца Гарадской мастацкай галерэі твораў Л.Д.Шчамялёва Ганна Ясюк.

Дачка мастака Маргарыта Шчамялёва таксама ўдзельнічала ў адкрыцці выставы і падзялілася сваімі эмоцыямі.

"Я заўсёды з асаблівымі пачуццямі прыязджаю ў Віцебск, таму што бацька заўсёды гаварыў, што гэты горад для яго быў самым галоўным у жыцці. Гэта яго дзяцінства, асабліва радасныя і самыя шчаслівыя моманты. Калі я ў яго спытала, чаму ён стаў мастаком, ён адказаў: "Я нарадзіўся ў Віцебску, як я мог быць кімсьці іншым?" Ён казаў, што тут нават пах быў алейнай фарбы. Ён з дзяцінства атрымліваў асалоду ад гэтага горада і, я помню, вельмі любіў Заходнюю Дзвіну. Нават такія бытавыя рэчы: калі яго пыталіся, што яму запомнілася, ён казаў, што тут рачная рыба вельмі смачная. Хоць ён бытам наогул не займаўся, а жыў толькі творчасцю. Віцебск, паветра, шырыня, Дзвіна - гэта заўсёды было ў яго размовах, калі збіралася вялікая сям`я на святы. Ён казаў, што бабуля яго правільна выхавала - давала яму свабоду, ён гуляў, колькі хацеў, але ведаў, што яму трэба вярнуцца і маляваць. Увага бацькоў, якія давалі яму магчымасць развівацца, і пасадзейнічала такому яго паглыбленню ў гэту складаную прафесію", - расказала яна.

Дачка мастака адзначыла, што цудоўна разумее бацьку і станаўленне яго творчага пачатку, таму што і сама натхняецца гэтым горадам. Пасля прыезду сюды яна кожны раз адпраўляецца ў музей Марка Шагала, які пакінуў яскравую старонку ў культурным летапісе Віцебска. Маргарыце Шчамялёвай таксама перадаўся творчы ген, і вясной яна прадстаўляла аўтарскую выставу габеленаў у абласным цэнтры, сярод яе работ былі і творы, прысвечаныя бацьку.

Леаніда Шчамялёва называюць майстрам-каларыстам - на палотнах ён яркімі і сакавітымі фарбамі перадаваў свае пачуцці, успаміны, адлюстроўваў сцэны са звычайнага жыцця. Сярод работ, прадстаўленых у экспазіцыі, ёсць і пейзаж Віцебска - успаміны з дзяцінства мастака. Яго любімая Заходняя Дзвіна, Свята-Успенскі сабор на высокім беразе, лодкі з адпачывальнікамі, а на заднім плане ўгадваюцца абрысы ратушы. Цёплы, светлы горад, які назаўсёды застаўся ў сэрцы жывапісца.

Выставу можна будзе наведаць у выставачнай зале Цэнтра сучаснага мастацтва да 3 верасня.

11 ліпеня 2023, Віцебск
Алеся Пушнякова - БЕЛТА