Ацэнкі ходу і тэрмінаў расійскай спецаперацыі ва Украіне можа даваць Вярхоўны галоўнакамандуючы, пра гэта заявіў намеснік старшыні Савета бяспекі Расіі Дзмітрый Мядзведзеў.

"Па тэрмінах, я спадзяюся, вы не чакаеце ад мяне адказу на гэтае пытанне, таму што гэта будзе некарэктна. Не будзем забягаць наперад", - сказаў ён у інтэрв’ю вядучым расійскім СМІ.

Мядзведзеў растлумачыў, што Расія ваюе не з украінскім рэжымам, а з 3,6-мільённай арміяй НАТА. Альянс непасрэдна ўдзельнічае ва ўкраінскім канфлікце, пастаўляючы тэхніку, сродкі паражэння і грошы.

Палітык адзначыў, што з пункту гледжання законаў вайны пастаўкі зброі не з’яўляюцца ўцягваннем у канфлікт. Аднак у выпадку, калі разам з гэтым узбраеннем прыбываюць ваенныя спецыялісты, то гэта з’яўляецца прамым доказам уцягвання ў канфлікт пэўнай краіны. Гэтыя вайскоўцы з’яўляюцца легальнай цэллю і павінны быць знішчаны.

"Ніяк інакш", - падкрэсліў ён.

Аднак, паводле яго слоў, у СВА нельга выключаць нічога і пры неабходнасці ісці да Кіева ці Львова, каб "вынішчыць гэтую заразу".

Палітык мяркуе, што адна з мэт спецаперацыі – стварэнне "санітарнай зоны".

"Выкінуць усіх замежнікаў, якія там (на тэрыторыі Расіі) знаходзяцца, у шырокім сэнсе гэтага слова, стварыць санітарную паласу, якая не дазволіць ужываць якія-небудзь віды зброі, якая працуе на сярэдніх і кароткіх дыстанцыях, гэта значыць кіламетраў 70–100, дэмілітарызаваць яе, калі казаць аб ваеннай кампаненце", - сказаў Мядзведзеў. Калі гэтых мер будзе недастаткова, то тады давядзецца "прымаць нейкія іншыя рашэнні".

Намеснік старшыні Савета бяспекі таксама заявіў, што заходні свет ненавідзіць не асобных кіраўнікоў у Расіі, а ўсіх расіян, і змагаецца з грамадзянамі краіны. Гэта праяўляецца ў санкцыях і абмежаваннях, якія ўводзяцца Захадам.

Мядзведзеў таксама закрануў тэму паставак Кіеву ўзбраенняў са збедненым уранам, аб якіх нядаўна заявіла Мінабароны Брытаніі.

Паводле яго слоў, "гэта не ядзерная зброя ў вузкім сэнсе гэтага слова, але гэта зброя з ядзерным следам". У вайне галоўнае – знішчыць праціўніка, аднак праблема ў тым, што наступствы выкарыстання такой зброі могуць быць вельмі цяжкія. Палітык парэкамендаваў украінскаму насельніцтву задумацца, наколькі мэтазгодна ўжыванне такога тыпу ўзбраенняў.

Мінск, 24 сакавіка 2023
Sputnik