Беларусь лічыць неабходным працягнуць работу па фарміраванні агульнага парадку дня ў галіне інфармацыйнай бяспекі ў АДКБ, заявіў старшыня Палаты прадстаўнікоў Нацсходу рэспублікі Уладзімір Андрэйчанка.

Асаблівую ўвагу ён прапанаваў удзяліць пытанню выкарыстання штучнага інтэлекту.

"Лічым неабходным працягнуць работу па фарміраванні агульнага парадку дня ў галіне інфармацыйнай бяспекі. Пры гэтым прапануем асаблівую ўвагу ўдзяліць тэме выкарыстання тэхналогій штучнага інтэлекту", - сказаў Андрэйчанка, выступаючы ў аўторак на пасяджэнні Парламенцкай асамблеі АДКБ у Маскве, яго цытуе прэс-служба Палаты прадстаўнікоў.

Падводзячы вынікі беларускага старшынства ў Арганізацыі ў 2023 годзе, спікер ніжняй палаты парламента адзначыў, што асаблівую ўвагу Мінск удзяліў павышэнню гатоўнасці калектыўных сіл да выканання задач па прызначэнні і ўмацаванні ваенна-тэхнічнага супрацоўніцтва. Ён нагадаў, што на тэрыторыі Беларусі ў гэтым годзе адбыўся комплекс вучэнняў, і "ёсць падставы меркаваць, што праведзеныя мерапрыемствы выканалі сваю мэтавую ўстаноўку па павышэнні гатоўнасці адпаведных сіл і сродкаў".

Паводле яго слоў, важным вынікам праведзенай у 2023 годзе работы па лініі парламентарыяў краін АДКБ стала выпрацоўка сумесных заяў аб прадухіленні гонкі ўзбраенняў у космасе, магчымых наступствах выкарыстання боепрыпасаў са збедненым уранам і гэтак далей.

У ліку важнейшых мадэльных законаў, прынятых Парламенцкай асамблеяй, на думку Уладзіміра Андрэйчанкі, сталі заканадаўчыя акты "Аб абароне інфармацыі і кібербяспекі", "Аб бяспецы крытычнай інфармацыйнай інфраструктуры", "Аб праекце рэкамендацый па заканадаўчым забеспячэнні біялагічнай бяспекі дзяржаў-членаў АДКБ".

У бягучым годзе АДКБ істотна палепшыла ўзаемадзеянне з Арганізацыяй Аб’яднаных Нацый у плане міратворчага і антытэрарыстычнага патэнцыялу. Беларусь актыўна каардынавала свае дзеянні ў рамках Еўразійскай групы Міжпарламенцкага саюза.

"Нягледзячы ні на што, мы выкарыстоўвалі пляцоўку АБСЕ і яе Парламенцкай асамблеі для давядзення да еўрапейскай супольнасці нашай думкі па актуальных пытаннях міжнароднага парадку дня", - паведаміў спікер Палаты прадстаўнікоў.

Ён падкрэсліў, што ў гэты момант мяняецца сістэма міжнародных адносін, і ў гэтых няпростых абставінах ключавую ролю набывае ўмацаванне адзінства ў АДКБ для захавання суверэнітэту і незалежнасці яе ўдзельнікаў.

У АДКБ, акрамя Беларусі, уваходзяць Арменія, Казахстан, Кыргызстан, Расія і Таджыкістан. У 2024 годзе старшынёй у Арганізацыі будзе Казахстан.

МІнск, 19 снежня 2023
Sputnik