Белорусский портал в Казахстане

У СНД будзе створана сістэма дапамогі мігрантам у пошуку работы на тэрыторыі іншай дзяржавы



Аб гэтым паведаміў начальнік аддзела працоўнай міграцыі Дэпартамента занятасці насельніцтва Міністэрства працы і сацыяльнай абароны Расіі Генадзь Седакоў.

Гэта прадугледжана праектам пагаднення аб арганізаваным наборы і прыцягненні грамадзян краін СНД да часовай працоўнай дзейнасці на тэрыторыі іншай дзяржавы Садружнасці. Пасяджэнне рабочай групы экспертаў па разглядзе дакумента праходзіць сёння ў Выканаўчым камітэце СНД у Мінску.

"У цэлым праект пагаднення накіраваны на стварэнне сістэмы дапамогі мігрантам у пошуку работы на тэрыторыі іншай дзяржавы. Гэта пытанні інфармавання, прафесійнай падрыхтоўкі, падбору, звязаныя з дапамогай у адпраўцы мігрантаў для іх вяртання на радзіму, гэта значыць нейкі комплекс пытанняў, які сёння ў свеце рэалізуецца многімі краінамі. Арганізаваны набор - даволі распаўсюджаная форма працаўладкавання мігрантаў. Мы вырашылі, што таксама можам на прасторы Садружнасці паспрабаваць рэалізаваць такую ідэю", - сказаў Генадзь Седакоў.

Пытанне аб актуальнасці дакумента абмяркоўвалася на пасяджэнні Кансультатыўнага савета па працы, міграцыі і сацыяльнай абароне насельніцтва ў верасні мінулага года. Яго ініцыятарам і распрацоўшчыкам стаў расійскі бок.

"Расія цяпер даволі актыўна з замежнымі партнёрамі прапрацоўвае двухбаковы праект пагаднення па арганізаваным наборы. Быў прапанаваны такі шматбаковы фармат. Мы паспрабавалі прапанаваць варыянт, які быў бы ўзаемапрымальны для нашых замежных партнёраў. Сёння будзем абмяркоўваць прапановы дзяржаў і будзем спадзявацца на тое, што зможам дамовіцца па тых пытаннях, якія выносяцца на парадак дня пасяджэння", - адзначыў начальнік аддзела.

Генадзь Седакоў падкрэсліў, што ў дакуменце фінансавыя пытанні непасрэдна не прапісаны.

"Гэта ўжо будзе вырашацца пры падрыхтоўцы фінансава-эканамічнага абгрунтавання. Але, як правіла, удзельнічаюць абодва бакі: і тыя дзяржавы, якія адпраўляюць, і тыя, якія прымаюць мігрантаў. Гэта пытанне субсідыярнай адказнасці, у тым ліку фінансавай. Але пры гэтым тут галоўнае не фінансавы складнік, а арганізацыйны. Неабходна, каб тыя арганізацыі і органы ўлады, якія зацікаўлены ў міграцыі, адказвалі за міграцыю і працу, удзельнічалі ў гэтым працэсе. Для нас важна арганізаваць саму работу", - дадаў ён.

Праект пагаднення аб арганізаваным наборы і прыцягненні грамадзян краін СНД для часовай працоўнай дзейнасці на тэрыторыі іншай дзяржавы Садружнасці прадугледжвае новыя напрамкі ўзаемадзеяння кампетэнтных органаў дзяржаў Садружнасці ў частцы інфарматызацыі працэсу падбору работы, даіміграцыйнай падрыхтоўкі, арганізаванага падбору і працаўладкавання мігрантаў.

Рэалізацыя дакумента будзе садзейнічаць стварэнню прававых і інстытуцыянальных умоў для ўзнаўлення, рэгулявання, абмену і рацыянальнага выкарыстання рабочай сілы ў дзяржавах СНД, а таксама яе свабоднаму перамяшчэнню па тэрыторыях краін Садружнасці з улікам сацыяльна-эканамічных інтарэсаў і патрабаванняў нацыянальных рынкаў працы кожнай дзяржавы.

Зацікаўленасць у прыняцці дакумента выказалі дзяржавы, якія як адпраўляюць, так і прымаюць мігрантаў, з прычыны актуальнасці пытанняў рэгулявання працоўнай міграцыі на постсавецкай прасторы, навізны прапануемых у праекце пагаднення падыходаў, неабходнасці правядзення скаардынаванай палітыкі па прыцягненні і выкарыстанні рабочай сілы.

9 верасня 2019, Мінск
БЕЛТА

Ссылка на текущий документ: http://belarus.kz/aktueller/6-402/1/49697
Текущая дата: 28.03.2024