Прадпрыемства рэалізавала інавацыйны праект па праграме "Адзін раён - адзін праект". Аналагаў такім ламінаваным ДСП у Беларусі да гэтага моманту не выраблялі. "Наша кампанія ва ўмовах абмежаванняў, якія ўвяліся ў 2022 годзе, вырашыла пераадольваць іх з дапамогай развіцця. Было прынята рашэнне аб рэалізацыі гэтага праекта. Па-другое, гэта магчымасць, каб забяспечыць больш поўную прысутнасць нашым прадуктам унутры Рэспублікі Беларусь. Па-трэцяе, імкнёмся ахапіць тыя сегменты рынку, на якія з прычын сваіх задач да 2022 года не маглі звярнуць пільную ўвагу. Па-чацвёртае, мы ўжо крыху перараслі тыя прадукты і асартымент, якія былі ў нас раней, і нам патрэбны быў нейкі штуршок. Якраз такім штуршком сталі санкцыі", - растлумачыў генеральны дырэктар ААТ "Івацэвічдрэў" Аляксандр Ільніцкі.

Для рэалізацыі праекта прыцягнулі ўласныя сродкі прадпрыемства, інавацыйнага фонду Брэсцкага аблвыканкама, крэдыт Банка развіцця. Прынятыя меры дадуць магчымасць павялічыць аб`ёмы вытворчасці ламінаваных пліт у 1,5 раза, пашырыць асартымент прадукцыі. У Івацэвічах будуць выпускаць зусім новыя для нашай краіны прадукты. Гэта пліты з глыбокімі структурамі паверхні і ламінаваныя пліты, дзе цісненне паверхні максімальна імітуе натуральную драўніну і іншыя матэрыялы (тэкстуры металу, тканіны і іншыя). Магчымасць сінхранізацыі дэкору і ціснення на абедзвюх плоскасцях упершыню будзе рэалізавана на рынку ламінаванай ДСП Беларусі.

Такія ламінаваныя пліты ў першую чаргу прызначаны для мэблевай прамысловасці. Акрамя таго, іх могуць набываць для выпуску мэблі па індывідуальных заказах.

Пётр Пархомчык назваў пуск новай лініі важнай падзеяй для Івацэвіч і ў цэлым для Брэсцкай вобласці. "Гэты праект - этап развіцця "Івацэвічдрэў". Ёсць яшчэ асобныя праекты, якія будзем абмяркоўваць. Прадпрыемства будзе развівацца. Два асноўныя напрамкі - гэта драўнянастружкавыя пліты простыя і ламінаваныя і мэбля. Нас радуе, што ўсе гэтыя напрамкі запатрабаваны. Больш за 65 працэнтаў прадукцыі, якую вырабляе прадпрыемства, пастаўляецца на экспарт", - адзначыў старшыня Брэсцкага аблвыканкама. Ён дадаў, што ААТ справілася са складанасцямі, сістэмна нарошчвае аб`ёмы вытворчасці, павялічвае пастаўкі на экспарт. "Прадпрыемства павінна развівацца, павінны стварацца новыя рабочыя месцы. І больш прыцягвайце моладзь. Ім можна давяраць", - канстатаваў кіраўнік Брэсцкай вобласці.

18 лістапада 2024, Івацэвічы
БЕЛТА