На Мінскім заводзе колавых цягачоў створана тэхніка для ўзброеных сіл Аб`яднаных Арабскіх Эміратаў і Анголы. 

Як паведаміў прадстаўнік Дзяржаўнага ваенна-прамысловага камітэта Беларусі Уладзімір Лаўранюк, першы прататып звышцяжкага аўтацягніка "МЗКТ-741351 + 999421 + 83721" быў спецыяльна спраектаваны для патрэб узброеных сілаў ААЭ.

Спецыялісты Volat выкарыстоўвалі найноўшыя праектныя ідэі і інжынерныя рашэнні, што дало магчымасць забяспечыць самы высокі ўзровень якасці і надзейнасці нароўні з высокай грузападымальнасцю і праходнасцю. Цяпер вядуцца работы па наладцы прататыпа і падрыхтоўцы яго да прабегавых выпрабаванняў. Першапачатковыя выпрабаванні аўтацягніка адбудуцца ў Беларусі. Поўны комплекс прыёмачных выпрабаванняў плануецца правесці ў ААЭ ўжо ў ліпені 2016 года.

У склад навінкі ад Volat уваходзіць паўнапрывадны 8х8 седлавы цягач "МЗКТ-741351", паўпрычэп "МЗКТ-999421" і прычэп "МЗКТ-83721". Аўтацягнік можа перавозіць да трох гусенічных і колавых баявых машын (БТР, БМП, гаўбіца G6) або 20/40-футавых кантэйнераў агульнай вагой да 130 тон. Аўтацягнік абсталяваны бартавы інфармацыйнай сістэмай, сістэмай кантролю ціску і цэнтральнай сістэмай падпампоўкі шын. Поўная маса аўтацягніка дасягае 210 тон.

Седлавы цягач "МЗКТ-741351" абсталяваны рухавіком CAT С18, каробкай перадач ALLISON з электронным кіраваннем, а таксама двайной гідраўлічнай барабаннай лябёдкай (уласнай распрацоўкі МЗКЦ па 25 тон на барабан), магутнасць шасціцыліндравага рухавіка з турбанаддувам і прамежкавым астуджэннем 597 кВт (812 к.с.).

Для забеспячэння аўтацягніка высокай праходнасцю і кіраванасцю на цягачы ўстаноўлена цалкам незалежная падвеска. Сталёвая модульная кабіна цягача выканана ў новым фірменным дызайне. Яна падрысорана, у ёй больш месца, што дазваляе з камфортам размясціць да васьмі чалавек унутры, уключаючы вадзіцеля і баявы экіпаж.

У стандартную камплектацыю ўваходзіць рэгуліроўка сядзення вадзіцеля, рэгуляваная рулявая стойка, халадзільнік і аўтаматычны клімат-кантроль. Кабіна абсталяваная фітынгамі для мацавання брані, мацаваннямі для зброі і паваротным люкам на даху. Для аблягчэння абслугоўвання на машыне ўсталяваная аўтаматычная сістэма змазкі, а таксама аўтаматычная сістэма пажаратушэння.

Для войска Анголы прызначаны седлавы цягач "МЗКТ-742960" з колавай формулай 8х8. Яго задача — перавозка буйнагабарытных цяжкавагавых грузаў у складзе аўтапоезда поўнай масай да 130 тон. Ён камплектуецца 544-моцным турбадызелем Deutz BF 8M1015C (V8), які адрозніваецца высокім круцячым момантам 2300 Нм, максімальная магутнасць складае 400 кВт (544 к.с.).

Двухрадная кабіна абсталяваная двума спальнымі месцамі, сістэмай ацяплення, кандыцыянерам і дазваляе з камфортам і бяспекай размяшчаць брыгаду з сямі чалавек. Важнай яе перавагай з`яўляецца магчымасць абсталявання ахоўнымі бронепласцінамі.

Вячаслаў Будкевіч, БелаПАН
Мінск, 8 красавіка 2016