"Першы кантэйнерны поезд па распрацаваным адзіным раскладзе руху, які забяспечвае сінхранізацыю часу паступлення, перагрузу, перадачу па стыкавых пунктах і рух па ўсіх участках чыгункі каляіны 1435 мм і 1520 мм, адправіўся па маршруце Сіянь - Дуйсбург. Першы пілотны кантэйнерны поезд у рамках укаранёнага адзінага скразнога раскладу паступіў на Беларускую чыгунку 2 лістапада 2022 года. Усе тэхналагічныя аперацыі ад прыёму да гатоўнасці перадачы праведзены на беларускім участку маршруту менш чым за суткі. Час тэрмінальнай апрацоўкі, перагрузкі кантэйнераў з вагонаў каляіны 1520 мм на вагоны каляіны заходняга стандарту 1435 мм, праходжання мытнага і іншых відаў кантролю на беларуска-польскай граніцы склаў менш за 9 гадзін. 3 лістапада 2022 года са станцыі Брэст-Паўночны поезд адправіўся ў Заходнюю Еўропу па каляіне 1435 мм", - расказалі ў прэс-цэнтры.

Поезд абсталяваны GPS-лакатарам, які працуе з кітайскай спадарожнікавай навігацыйнай сістэмай Beidou, што функцыянуе па ўсім свеце. "Кліенты, якія перавозяць свае тавары ў Еўропу, могуць у рэжыме рэальнага часу кантраляваць іх дыслакацыю", - растлумачылі ў БЧ.

Гэты праект рэалізаваны ў рамках далейшага развіцця кантэйнерных перавозак сумесна з чыгуначнымі кампаніямі Кітая, Расіі, Казахстана, Беларусі і Заходняй Еўропы. Адзіны графік руху кантэйнерных паяздоў паміж Кітаем і Еўропай будзе паэтапна ўводзіцца з мэтай забеспячэння лагістычных патрэбнасцей кліентаў і павышэння якасці паслуг.

4 лістапада 2022, Мінск
БЕЛТА