Надзвычайны і паўнамоцны пасол Ізраіля ў Беларусі Алекс Гольдман-Шайман назваў Халакост агульным болем для дзвюх краін.

27 студзеня ва ўсім свеце адзначаецца Міжнародны дзень памяці ахвяр Халакоста.

"На тэрыторыі Беларусі (у гады ВАВ) было забіта больш за 800 тысяч яўрэяў нацыстамі і іх памагатымі. Гэтыя лічбы - гэта нашае ўзаемнае гора", - заявіў пасол у эфіры першага канала Беларускага радыё.

Паводле яго слоў, аб гэтых злачынствах трэба не толькі памятаць і расследаваць, але і вынесці з іх урокі, каб такое больш не паўтарылася.

Пасол таксама падкрэсліў, што ў Ізраілі, як і ў Беларусі, шануюць гэту сумную і значную дату.

Закранаючы тэму расследавання крымінальнай справы аб генацыдзе беларускага народа ў гады ВАВ, якую праводзіць Генпракуратура Беларусі, пасол сказаў: "Вядома ж, нам (Ізраілю) будзе цікава даведацца больш дэталей аб лёсах і імёнах тых яўрэяў, якія тут, у Беларусі, жылі і былі па-зверску забіты, каб захаваць аб гэтым памяць".

Паводле слоў кіраўніка дыпмісіі, у Ізраілі пытаннямі ўвекавечвання памяць ахвяр Халакоста пастаянна займаюцца музеі і навукоўцы.

"Але тая інфармацыя, якая будзе знойдзена ў Беларусі, будзе нам цікавая. (...) я спадзяюся, што Халакост беларускіх яўрэяў будзе больш вывучаны", - сказаў ён.

Пры гэтым ён падкрэсліў, што гэта тэма становіцца актуальнай і важнай у Год гістарычнай памяці, які аб`яўлены ў Беларусі.

Учора ў цэнтры Бейт Сімаха ў Мінску прайшла памінальная служба ў памяць аб ахвярах Халакосту, у якой прынялі ўдзел прадстаўнікі чатырох асноўных рэлігійных канфесій у Беларусі - праваслаўнай, каталіцкай, мусульманскай і іудзейскай.

У сінагогу на Шорнай таксама па традыцыі ў такі дзень прыйшлі прадстаўнікі дыпкорпусу, у тым ліку пасол Ізраіля.

Мінск, 27 студзеня 2022
Sputnik