Міністр пачаў з рэмаркі наконт агаворкі ў выступленні Жазэпа Барэля, калі той, маючы на ​​ўвазе Беларусь, тым не менш вымавіў назву краіны як Украіна, сказаўшы, што Аляксандр Лукашэнка не з`яўляецца легітымным Прэзідэнтам Украіны.

"Адразу папрашу: не тлумачце мой адказ як умяшанне ва ўнутраныя справы Украіны... Хоць, вядома, па гэтай агаворцы ўжо, на жаль, глыбіня валодання беларускім дасье з боку Бруселя відавочная. Магчыма, недзе гэта і наша недапрацоўка. Усе могуць памыляцца", - заўважыў Уладзімір Макей.

"Але ў гэтым выпадку татальна засмучае іншае - поўнае нежаданне з боку ЕС нават паспрабаваць аб`ектыўна разабрацца ў працэсах, што адбываюцца. Таму ацэнкі Жазэпа Барэля лічу катэгарычнымі і тэндэнцыйнымі", - падкрэсліў кіраўнік МЗС.

Уладзімір Макей, у прыватнасці, адзначыў, што Жазэп Барэль гаварыў аб тым, што абавязкова да будучага пасяджэння Савета ЕС павінны быць прыняты санкцыі, і гэта, паводле яго слоў, павінна пацвердзіць аўтарытэт ЕС.

"Не верыцца, але гэта амаль цытата. А мы былі ўпэўнены, што аўтарытэт ЕС усё ж трымаецца не на санкцыях, - заўважыў міністр. - Або ўзяць катэгарычныя патрабаванні аб пачатку нейкага інклюзіўнага нацыянальнага дыялогу. Безумоўна, з прафесійнага пункту гледжання лічу, што патрабаваць таго, што ўжо запланавана і анансавана, - сведчанне несумненна добрага бюракратычнага вопыту і аналітычнага разліку. Тады нагадваю, што Прэзідэнт Беларусі нядаўна зноў пацвердзіў гатоўнасць ініцыяваць працэс рэфармавання палітычнай сістэмы ў краіне на аснове прыняцця паправак у Канстытуцыю. Дастаткова было хаця б прачытаць або працытаваць кіраўніка беларускай дзяржавы".

"Або пад дыялогам разумеецца нейкі іншы алгарытм, здольны прагнаць смагу адсутных геапалітычных рэваншаў ЕС?" - паставіў пытанне кіраўнік беларускага знешнепалітычнага ведамства.

Уладзімір Макей выказаўся і наконт назойліва агучваемай пазіцыі ЕС, што паўторнае правядзенне выбараў - найлепшае рашэнне.

"Найлепшае рашэнне для каго? Для ЕС, у якога не атрымалася выйграць на праведзеных у Беларусі выбарах? А вы ўпэўнены, што гэта было б найлепшым рашэннем? Ёсць прыклады, дзе такія "найлепшыя рашэнні" ЕС прывялі да найлепшых вынікаў? Ці агаворка Жазэпа Барэля ўсё ж такі была сэнсавая? - акрэсліў пытанні міністр. - Дык, можа, адсюль размовы і пра нелегітымнасць Прэзідэнта Беларусі? У нас прайшлі выбары, няхай па некаторых высокіх канонах і не ідэальна, аднак народ сваёй большасцю, гэта сёння складана паставіць пад сумненне, вызначыў іх пераможцу. Хацелася б зразумець, на якой падставе прадстаўнікі ЕС ставяць сябе ўпоравень з беларускім народам і лічаць, што маюць права выносіць вердыкты аб прымальнасці для беларусаў вынікаў выбараў. Для мяне гэтыя велічыні дакладна не раўназначныя".

"І, у прынцыпе, да чаго прыйдзе свет, калі кожны знешні ігрок пачне прама аспрэчваць вынікі выбарчага працэсу ў іншых краінах?" - задаў рытарычнае пытанне Уладзімір Макей.

"Мы так і разумеем дэмакратыю - прыняць меркаванне большасці, а не выкарыстоўваць усе існуючыя сродкі і тэхналогіі, каб перарабіць іх пад сябе", - дадаў ён.

Што датычыцца візіту дзеючага старшынства АБСЕ, міністр заявіў, што яго здзіўляе, што прадстаўнікі АБСЕ так ірвуцца прыехаць у Беларусь ледзь ці не на наступны дзень, аднак пры гэтым, калі было сапраўды трэба, не паспелі за тры тыдні накіраваць місію БДІПЧ па назіранні за выбарамі.

"Гэта значыць цяпер адсутнасць запрашэння ўжо не турбуе?" - адзначыў Уладзімір Макей.

Ён падкрэсліў, што на самай справе пазіцыя Беларусі была выразна і недвухсэнсоўна даведзена заходнім партнёрам як па двухбаковых каналах, так і на самой пляцоўцы АБСЕ: "Беларусь з павагай ставіцца да АБСЕ і лічыць гэту арганізацыю важным інструментам для падтрымання міру і стабільнасці ў рэгіёне. Разам з тым мы пакуль не бачым, і кантакты, якія адбыліся на сённяшні дзень, нас не змаглі ў гэтым пераканаць, "дабаўленай вартасці" ў візіце дзеючага старшынства і пасрэдніцкіх паслугах АБСЕ для наладжвання ўнутрыпалітычнага дыялогу ў Беларусі".

"Паверце, беларусы самі справяцца з гэтай задачай. Пры гэтым мы, вядома ж, не выключаем візіту прадстаўніка АБСЕ, калі гэта сапраўды будзе карысна. Яшчэ раз заяўляю, што беларускі бок заўсёды гатовы да адкрытага і ўзаемапаважлівага дыялогу з усімі зацікаўленымі міжнароднымі партнёрамі, уключаючы Еўрапейскі саюз. Павінен прызнацца, што і па выніках маіх папярэдніх асабістых і тэлефонных кантактаў са спадаром Барэлем у мяне склалася ўражанне, што і ў ЕС думаюць гэтак жа. Не хацелася б расчаравацца ў гэтым канчаткова", - рэзюмаваў міністр.

15 верасня 2020, Мінск
БЕЛТА