«Я сёньня тут — горды амэрыканец і ўнук людзей, якія перажылі Галакост. Падчас Другой Сусьветнай вайны мае продкі Рая і Джозэф Кушнэры ўцяклі са свайго дому ў беларускі лес, каб пазьбегнуць сьмерці ад нацыстаў. Ім неяк удалося перанесьці жахі і выжыць. Пасьля вайны яны пабудавалі новае жыцьцё ў Амэрыцы — маяку надзеі і краіне бязьмежных магчымасьцяў», — сказаў старэйшы дарадца Белага дома.

Кушнэр дадаў, што здымкі сваіх бабулі і дзеда ён трымае на працоўным стале ў Белым доме.

Дзед і бабуля Джарэда Кушнэра паходзяць з Наваградку і Карэлічаў, што ў Гарадзенскай вобласьці. Рая Кушнэр нарадзілася і жыла ў Наваградку, а Джозэф (Ёзаф) паходзіў з Карэлічаў. Пасьля вайны ў 1945 годзе яны эмігравалі ў ЗША.

Джарэдаў бацька, амэрыканскі мільярдэр Чарльз Кушнэр, быў у Наваградку ўжо некалькі разоў, а першы раз у 1989 годзе разам з сваёй маці, якая там нарадзілася. Менавіта яна апавяла яму гісторыю жыцьця іх сям’і, паказала, дзе быў іх дом, дзе гета, зь якога ў вайну яна праз тунэль уцякла разам з маці і дзедам, і як перажыла Галакост у Налібацкай пушчы.

Радыё Свабода, 14 траўня 2018