У сваім выступе яна выказала падзяку беларускаму боку "за магчымасць гаварыць у Мінску — цудоўным горадзе і гістарычным скрыжаванні Еўропы".

Брант адзначыла, што за апошнія 25 гадоў Беларусь і Нідэрланды "дасягнулі пэўнага прагрэсу, але ў іх адносінах заставаліся складанасці". "Тым не менш нам заўсёды ўдавалася канструктыўна супрацоўнічаць ва ўсталяванні адносін у інтарэсах грамадзян нашых краін", — падкрэсліла дыпламат.

Яна выказала надзею, што адкрыццё аддзялення пасольства Нідэрландаў у Мінску дапаможа стварыць "лепшую будучыню для грамадзян дзвюх краін".

У сваю чаргу міністр замежных спраў Беларусі Уладзімір Макей заявіў, што адкрыццё аддзялення пасольства Нідэрландаў у Мінску "пачынае новую гісторыю ў адносінах дзвюх краін". "Гэта дапаможа нам даведвацца пра падзеі ў краінах з першых вуснаў", — сказаў ён.

Паводле слоў Макея, Беларусь і Нідэрланды працягнуць актыўны палітычны дыялог, а таксама будуць развіваць гандлёва-эканамічныя адносіны.

Міністр таксама паведаміў, што на сённяшні дзень у Беларусі адкрыта прыблізна 60 дыпламатычных устаноў розных краін. І беларускі бок гатовы працягваць працу ў гэтым кірунку, дадаў ён.

Аддзяленне пасольства Нідэрландаў размяшчаецца на вуліцы Мяснікова, 70. 

Дыпламатычныя адносіны паміж Рэспублікай Беларусь і Каралеўствам Нідэрландаў былі ўстаноўленыя 24 сакавіка 1992 года. У ліпені 1993-га ў Гаазе адкрылася генеральнае консульства Беларусі, якое праз тры гады было пераўтворанае ў пасольства.

У Беларусі па сумяшчальніцтве акрэдытаваны пасол Нідэрландаў у Рэспубліцы Польшча.

Паводле інфармацыі МЗС, рашэнне аб адкрыцці ў Мінску дыппрадстаўніцтва Нідэрландаў было прынятае ў маі 2015 года.

БелаПАН
Мінск, 10 ліпеня 2017