У канцылярыі заявілі, што некаторыя замежныя СМІ распаўсюджваюць чуткі аб ад’ездзе Асада з Дамаска або кароткіх візітах у тую ці іншую краіну. «Канцылярыя Сірыйскай Арабскай Рэспублікі пацвярджае, што прэзідэнт працягвае выконваць сваю работу, нацыянальныя і канстытуцыйныя абавязкі са сталіцы, Дамаска», — адзначылі там.

Прадстаўнікі ўлад Егіпта і Іарданіі звярнуліся да Асада з заклікам тэрмінова пакінуць краіну і стварыць урад у выгнанні. Газета The Wall Street Journal пісала, што кіраўнік дзяржавы застаецца ў Сірыі, аднак на мінулым тыдні яго сям’я з’ехала ў Расію.

Тым часам абраны прэзідэнт ЗША Дональд Трамп заявіў, што Амерыка не павінна ўдзельнічаць у падзеях, якія адбываюцца ў Сірыі, бо гэта не з`яўляецца амерыканскай вайной. Пра гэта паведамляе ТАСС.

«У Сірыі адбываецца хаос, але гэта не наш саюзнік, і ЗША не павінны ўмешвацца. Гэта не наша вайна, і трэба дазволіць сітуацыі вырашыцца самастойна», — падкрэсліў Трамп.

Звязда, 7 снежня 2024