Непагадзь абрынулася на Аб’яднаныя Арабскія Эміраты, выклікаўшы наймацнейшы дождж, калі-небудзь зарэгістраваны ў пустыннай краіне. Ён затапіў участкі асноўных аўтамагістраляў і міжнародны аэрапорт Дубая, парушыўшы планы тысяч турыстаў. 

Школы ў ААЭ ў асноўным закрыліся з-за непагадзі, а дзяржаўныя служачыя, па магчымасці, працавалі выдалена. У Рас-эль-Хайме (самы паўночны эмірат ААЭ) паліцыя паведаміла, што 70-гадовы мужчына загінуў, калі яго аўтамабіль быў змыты паводкай.

Інфармацыйнае агенцтва Аб’яднаных Арабскіх Эміратаў WAM назвала дождж «гістарычнай з’явай надвор’я», якая перасягнула «ўсё, што было задакументавана з моманту пачатку збору дадзеных у 1949 годзе». Ападкі сталі наймацнейшымі за апошнія 75 гадоў. Звычайна надвор’е ў ААЭ адрозніваецца высокімі тэмпературамі і сухасцю.

Дажджы пачаліся позна ўвечары 15 красавіка. Шторм узмацніўся каля 9 раніцы па мясцовым часе 16 красавіка і працягваўся на працягу дня, абвальваючы дождж і град на горад. У Дубаі за два дні выпала больш за 142 мм ападкаў. Пры гэтым у сярэднім за год у міжнародным аэрапорце Дубая выпадае 94,7 мм ападкаў. У Фуджэйры, эміраце на ўсходнім узбярэжжы ААЭ, 16 красавіка выпала 145 мм ападкаў.

Інфраструктура, не прызначаная для такога дажджлівага надвор’я, не спраўляецца, дарогі і метро затоплены. Улады адправілі спецыяльную тэхніку на вуліцы і шашу, каб адпампоўваць ваду. Таксама пацярпелі некаторыя гандлёвыя цэнтры і дамы. Па дадзеных Khaleej Times, была затоплена адна са станцый метро. Метрапалітэн Дубая працуе з перабоямі, рух грамадскага транспарту абмежаваны. Асацыяцыя футбола ААЭ аб’явіла аб адмене ўсіх матчаў, якія павінны былі прайсці 16 красавіка.

Міжнародны аэрапорт Дубая прызнаў сёння раніцай, што паводка пакінула «абмежаваныя магчымасці транспарціроўкі» і паўплывала на палёты, паколькі экіпажы самалётаў не змаглі дабрацца да аэрадрома. «Аднаўленне зойме некаторы час. Мы дзякуем вам за ваша цярпенне і разуменне, пакуль мы вырашаем гэтыя праблемы», — гаворыцца ў паведамленні аэрапорта на платформе X.

Затрымліваліся авіярэйсы з Дубая, у тым ліку рэйсы ў сталіцу Беларусі.

Сацсеткі абляцелі эмацыйныя відэаролікі, у якіх відаць, як самалёты ў аэрапорце рассякаюць патокі вады, нібы караблі. А таксама ролікі, дзе маланка зіхаціць у небе, час ад часу кранаючы небаскроб Бурдж-Халіфа — самы высокі будынак у свеце. На апублікаваных у сацсетках запісах можна ўбачыць, як вадзіцелі кідаюць свае аўтамабілі, бо дарогі сталі нагадваць рэкі.

Гасцініцы Дубая працягнулі пражыванне турыстам, якія не змаглі вылецець дадому з-за ліўня.

Згодна з прагнозамі, дождж працягнецца і сёння, 17 красавіка. Нацыянальны метэаралагічны цэнтр заклікаў жыхароў прыняць усе меры засцярогі і выконваць меры бяспекі падчас нестабільных умоў надвор’я, а таксама не набліжацца да месцаў затаплення, інфармуе агенцтва WAM. У авіякампаніі запэўнілі, што пасажыры адмененых рэйсаў атрымаюць кампенсацыю ў поўным аб’ёме.

Ліўні таксама прайшлі ў Бахрэйне, Катары і Саудаўскай Аравіі. У Амане, размешчаным на ўсходняй ускраіне Аравійскага паўвострава, за апошнія дні ў выніку праліўных дажджоў загінулі сама меней 18 чалавек. У іх лік уваходзяць каля 10 школьнікаў, якія знаходзіліся ў машыне са дарослым, калі іх змыла патокам вады.

Звязда, 17 красавіка 2024