— Мы не можам зараз нічога сказаць пра матывы гэтага ўчынку, бо невядомы тыя, хто яго здзейсніў. Быў гэта акт вандалізму, крадзеж ці яшчэ нешта, пакуль незразумела, — паведаміла карэспандэнту "Звязды" намеснік начальніка аддзела ідэалагічнай работы Ваўкавыскага райвыканкама Святлана Вараніца. — Гэта ўжо трэці выпадак, калі помнік пашкодзілі. Летась спачатку гэтак жа знікла дзяржальна аднаго з мячоў, другі не прымусіў сябе чакаць. Што датычыць нядаўняга здарэння, дык супрацоўнікі ваенна-гістарычнага музея імя Баграціёна, побач з якім знаходзіцца памятны знак, заўважылі адсутнасць часткі аднаго з мячоў пасля выхадных. Цяпер вось дзяржальна адламалі, але ў мінулы раз здолелі выцягнуць і меч, што знаходзіцца ў камені.

Ва ўнітарным прадпрыемстве "Ваўкавыская камунальная гаспадарка", якое адказвае за памятны знак, вельмі занепакоены, што непрыемная сітуацыя паўтараецца:

— Пасля мінулай восені, каб заказаць і адліць у Лідзе новыя мячы і адрамантаваць помнік, давялося патраціць больш за чатыры з паловай мільёны беларускіх рублёў, — расказаў намеснік кіраўніка па ідэалагічнай рабоце ўнітарнага прадпрыемства "Ваўкавыская камунальная гаспадарка" Мікалай Нарута.

Па факце здарэння Ваўкавыскі РАУС праводзіць праверку. Нагадаем, што памятны знак у гонар 600-годдзя Грунвальдскай бітвы быў усталяваны летась,16 ліпеня, і ўжо восенню пацярпеў ад вандалаў. 13 ліпеня гэтага года, да свята горада, помнік здолелі аднавіць. Мячы, якія і з`яўляюцца аб`ектам злачыннай цікавасці, зроблены з сілуміну (сплаў алюмінія з крэмніем).

Ганна Гарустовіч
Звязда, 19 ліпеня 2012

Ссылка на текущий документ: http://belarus.kz/aktueller/all/2965/15220

Текущая дата: 29.09.2024