"Прадпрыемства "Агракамбінат "Дзяржынскі" з тэхнічнага пункту гледжання добра аснашчана і мае магчымасць аператыўна праводзіць усе віды палявых і ўборачных работ. Аднак у перыяд уборкі кукурузы ў 2022 годзе тут былі вельмі моцныя ападкі і глеба была моцна пераўвільготнена. Тэхнічна мы не маглі ўбраць гэтыя палі, таму што дарагія камбайны патрабуюць больш беражлівага абыходжання і псаваць іх у існуючых умовах надвор`ях было нельга. Тады мы звярнуліся да кіраўніка дзяржавы з просьбай пакінуць гэта поле на вясну і ў якасці эксперымента ўбраць яго ў 2023 годзе. Прэзідэнт згадзіўся і даў каманду па ўсёй тэрыторыі Беларусі пакінуць па 5-6 га палёў кукурузы на зіму для вопыту", - расказаў Леанід Заяц.

Ён дадаў, што кожны год у Беларусі ідзе намалот каля 2 млнт т кукурузы ў розных умовах надвор`я. Таму напрацаваць такі практычны вопыт, які можна было б выкарыстоўваць у нашай краіне, вельмі важна.

"Са згоды кіраўніка дзяржавы мы пакінулі 72 га кукурузы па ўсёй тэрыторыі Беларусі і назіралі за гэтымі пасевамі на працягу лістапада - красавіка. Частку іх усё ж давялося ўбраць у снежні-лютым, таму што ў краіне сур`ёзна павялічылася колькасць дзікіх капытных жывёл (ласёў, аленяў, казуль), якія затоптвалі гэтыя пасевы", - растлумачыў віцэ-прэм`ер.

У гаспадарках Мінскай вобласці засталося 16 га палёў кукурузы. Аднак перш чым убраць зерне, службы ветэрынарнага кантролю правялі даследаванні ўзораў гэтай кукурузы ў лабараторыях.

"Вынікі паказалі, што вільготнасць гэтай кукурузы складае 15 працэнтаў. Пры гэтым вільготнасць кукурузы, якую ўбіралі восенню 2022 года, была 43-45 працэнтаў. Каб дапрацаваць яе да патрэбных параметраў, неабходна было затраціць вялікую колькасць электраэнергіі і газу, а ўсё гэта накладвае вялікі адбітак на сабекошт зерня", - заявіў Леанід Заяц.

Паводле яго слоў, аналіз кукурузы на мікратаксіны не выявіў тых шкодных рэчываў, якія маглі б згубна паўплываць на жывёлагадоўлю.

"Адзінае, ёсць адзін мікратаксін, які перавышае норму на 5-7 працэнтаў, але ў складзе камбікорму яго слядоў выяўлена не было. Таму ў выпадках, калі ў гаспадаркі вялікія плошчы кукурузы на зерне, а надвор`е для ўборкі зусім неспрыяльнае, каб пазбегнуць пашкоджання тэхнікі пакідаць такія пасевы на вясну можна. Але рабіць гэта трэба ў выключных выпадках, калі абставіны таго сапраўды патрабуюць. Лепш за ўсё ўбіраць кукурузу ў той год, калі яна сеецца", - рэзюмаваў намеснік прэм`ер-міністра Беларусі.

Сёння ўборка кукурузы на эксперыментальных палях ужо будзе поўнасцю завершана.

21 красавіка 2023, Мінск
БЕЛТА