У суботу на спаборніцтвах у Кіраўску медалі разыгрывалі жанчыны. У лік удзельніц фіналу ўвайшлі 40 лепшых спартсменак у слаламе па выніках усіх этапаў Кубка Расіі, сярод іх — і наймацнейшая гарналыжніца Беларусі Марыя Шканава, якая па ходзе сезона атрымала восем перамог у гэтай дысцыпліне. Тым не менш, на апошнім этапе турніру беларуска апынулася другой, прайграўшы па суме дзвюх спробаў масквічцы Анастасіі Гарнастаевай 0,64 сек. Трэці час паказала новаспечаная чэмпіёнка Расіі ў слаламе Віталіна Гірына.

Такім чынам, Марыя Шканава сабрала поўную калекцыю ўзнагарод на спаборніцтвах у Мурманскай вобласці. Акрамя выйгрышу срэбра ў заключнай гонцы сезона, беларуская гарналыжніца заваявала золата міжнароднага турніру «На Кубак «Вялікага Вуд’яўра», а таксама стала бронзавым прызёрам чэмпіянату Расіі.

Звязда, 15 красавіка 2023