Дыпламат падрабязна закрануў гэту тэму: «Пасля Другой сусветнай вайны ЗША ўзначалілі стварэнне Брэтан-Вудскай сістэмы, Міжнароднага валютнага фонду і Сусветнага банка, а таксама разам з дапамогай плана Маршала стварылі міжнародную валютную сістэму з доларам ЗША ў якасці ядра. Статус долара як асноўнай міжнароднай рэзервовай валюты дапамагае ЗША сабраць сеньяраж з усяго свету. ЗША купляюць тавары і паслугі іншых краін на суму, эквівалентную $100, выплачваючы 100-доларавую банкноту, сабекошт якой усяго толькі 17 цэнтаў».

«Гегемонія долара ЗША — галоўная крыніца нестабільнасці і няпэўнасці ў сусветнай эканоміцы», — выказаў меркаванне пасол КНР у Беларусі.

«На фоне пандэміі COVID-19 ЗША злоўжылі сваёй глабальнай фінансавай гегемоніяй і ўкінулі некалькі трыльёнаў долараў на сусветны рынак, расплачваюцца за гэта толькі іншыя краіны, асабліва краіны з эканомікай, што развіваецца, — прадоўжыў Се Сяаюн. — У 2022 годзе Федэральная рэзервовая сістэма ЗША спыніла сваю свышмяккую грашова-крэдытную палітыку і перайшла да палітыкі радыкальнага павышэння працэнтных ставак, што прывяло да ўзрушэнняў на міжнародным фінансавым рынку і рэзкага абясцэньвання розных валют, такіх, як еўра, якія апусціліся да новага мінімуму за апошнія 20 гадоў. Многія краіны, што сталі на шлях развіцця, пацярпелі з-за моцнай інфляцыі, дэвальвацыі нацыянальнай валюты і адтоку капіталу».

«Эканомікам усяго свету як ніколі раней стала патрэбна стабільная, бяспечная і прадказальная міжнародная валютная сістэма», — упэўнены пасол КНР у Беларусі.

Звязда, 27 лютага 2023