У перыяд з 7 па 14 кастрычніка ў Беларусі праходзіць Тыдзень маці. Мэта яго — прыцягнуць увагу да самай галоўнай жанчыны ў жыцці кожнага з нас, акружыць яе клопатам і цяплом, абмеркаваць пытанні аховы мацярынства і дзяцінства, павышэння прэстыжу моцнай сям`і.

Усяго ў рэспубліцы сёння — 1 177 200 сем`яў з дзецьмі. З іх 65% складаюць сем`і з адным дзіцем (764 400 сем`яў), 29,3% — сем`і з дваімі дзецьмі і 5,7% — сем`і з траімі і больш дзецьмі.

Як адзначаюць спецыялісты, у нашай краіне створаны спрыяльныя ўмовы для мацярынства. У Беларусі дзейнічае дзесяць відаў дзяржаўных дапамог сем`ям з дзецьмі. Як паведаміла журналістам намеснік начальніка ўпраўлення народанасельніцтва, гендарнай і сямейнай палітыкі Міністэрства працы і сацыяльнай абароны Беларусі Марына Арцёменка, усяго дзяржаўныя дапамогі ў Беларусі выплачваюцца на звыш чым 447 тысяч дзяцей (ці больш чым на чвэрць ад іх агульнай колькасці).

Прычым заканадаўства ў галіне дзяржаўнай падтрымкі сем`яў, якія выхоўваюць дзяцей, пастаянна ўдасканальваецца. Узмацняецца сацыяльная абарона сем`яў, якія выхоўваюць дзяцей-інвалідаў. З пачатку года павышаны памеры дапамог па доглядзе дзіцяці-інваліда з 65% да 100% бюджэту пражытковага мінімума (БПМ), на дзяцей, старэйшых за 3 гады — з 30% да 50% БПМ. З`явіліся таксама дадатковыя гарантыі пры нараджэнні дзяцей у шматплодных родах: пры нараджэнні двайнят або больш дзяцей на кожнае дзіця выплачваецца дапамога на набыццё рэчаў першай неабходнасці ў памеры 2 БПМ.

Перагледжаны аб`ёмы фінансавай дапамогі шматдзетным сем`ям у пагашэнні запазычанасці па льготных крэдытах пры будаўніцтве (рэканструкцыі) жылля. Пры наяўнасці ў сям`і траіх непаўналетніх дзяцей сума запазычанасці па выдадзеных крэдытах пагашаецца ў памеры 75%, пры наяўнасці чатырох і больш непаўналетніх дзяцей — 100%.

У наступным годзе будуць перагледжаны падыходы да прызначэння і выплаты дзяржаўных дапамог сям`і ў перыяд догляду дзяцей. Парламентарыі 8 кастрычніка гэтага года прынялі ў першым чытанні праект закона "Аб дзяржаўных дапамогах сем`ям, якія выхоўваюць дзяцей", дзе прадугледжана, што памер дапамогі на першае дзіця будзе складаць 35% ад сярэднямесячнай заработнай платы, на другое і наступных — 40% сярэднямесячнай заработнай платы.

Акрамя таго, найбольш сацыяльна неабароненым катэгорыям грамадзян плануецца прызначэнне дапамог на дзяцей, старэйшых за тры гады, без уліку даходаў сям`і.

Прадастаўлена права на павышаны памер стандартнага падатковага выліку (246 тыс. руб.) бацькам, якія маюць двух і больш дзяцей (да 1 студзеня 2012 года такое права мелі толькі шматдзетныя бацькі і сем`і, якія выхоўваюць дзіця-інваліда).

З 1 красавіка 2012 года ўсе дзеці ва ўзросце да 3 гадоў забяспечваюцца бясплатнымі лекамі, якія выдаюцца па рэцэптах урачоў у межах пераліку асноўных лекавых сродкаў.

***

Як адзначае галоўны акушэр-гінеколаг Міністэрства аховы здароўя Святлана Сарока, здароўе дзіцяці знаходзіцца ў прамой залежнасці ад стану здароўя маці, яе фізічнай і маральнай гатоўнасці да нараджэння дзіцяці. Сёння 96,4% цяжарных звяртаюцца ў жаночыя кансультацыі ў раннія тэрміны цяжарнасці, што важна для бяспечнага мацярынства. Для параўнання: у 2000 годзе гэты паказчык быў роўны 60,7%.

Акрамя таго, у апошнія гады намецілася тэндэнцыя да павелічэння ўдзельнай вагі нармальных родаў. Так, у 2011 годзе 38% родаў працякалі без якіх-небудзь ускладненняў (у 2000 годзе гэты паказчык склаў 24,4%). Ды і ў цэлым, пачынаючы з 2003 года, у нашай краіне назіраецца тэндэнцыя павелічэння нараджальнасці. Так, у 2011 годзе нарадзілася 109 тыс. 364 дзіцяці, што на 23% больш, чым за 2003 год — 88 тыс. 679 дзяцей. А паказчыкі дзіцячай смяротнасці знізіліся з 10,5 на 1 тыс. народжаных жывымі ў 2000 годзе да 3,9 у 2011 годзе (з улікам немаўлят з вагой ад 500 да 999 г) і застаюцца найбольш нізкімі на тэрыторыі СНД.

Святлана Бусько
Звязда, 13 кастрычніка 2012