Новы аформлены ў фірменных колерах World of Tanks самалёт "Белавія" прызямліўся ў Нацыянальным аэрапорце Мінск.

Паветранае судна стала другім сумесным праектам кампаній. Самалёт традыцыйна пафарбаваны ў чорны колер. Фігура на фюзеляжы ўтворана яркімі элементамі камуфляжу ў фірменных колерах World of Tanks і нагадвае сілуэт танка. У цэнтры кампазіцыі - зубр як адзін з галоўных сімвалаў Беларусі.

Асноўная ідэя брэндзіраванай ліўрэі - паказаць, што гульня, вядомая ва ўсім свеце, родам з Беларусі. У адрозненне ад папярэдняга, дзе змяненні закранулі толькі фюзеляж, у новым "танкалёце" шмат увагі было ўдзелена афармленню інтэр`ера.

Гэта будзе першы ў свеце авіялайнер, цалкам брэндзіраваны камп`ютарнай гульнёй. "Зубр - вялікая, магутная, высакародная жывёліна. Можна сказаць, што гэта танк у свеце жывёл, - гаворыць кіраўнік аперыравання Wargaming у рэгіёне СНД Андрэй Мураўёў. - World of Tanks ужо восем гадоў папулярызуюць краіну ва ўсіх рэгіёнах планеты, пераймаючы эстафету ў гэтага магутнага звера, і спалучэнне двух вобразаў - гэта лепшы спосаб звязаць краіну і прадукт, які папулярызуе яе ва ўсім свеце. Мы ганарымся тым, што World of Tanks родам з Беларусі".

У салоне - атмасфера World of Tanks: гукавое суправаджэнне будзе ўнікальным: з выкарыстаннем унутрыгульнявых тэрмінаў, а мноства элементаў інтэр`ера - ад шторкі паміж класамі да адкідных столікаў - аформлены ў духу гульні. На кожным століку размешчана гістарычная даведка пра знакаміты танк або самаходку. Дзякуючы гэтаму пасажыры даведаюцца больш і пра гісторыю танкабудавання, і пра буйнейшы гульнявы праект, створаны на тэрыторыі СНД. У планах таксама змяніць элементы формы бортправаднікоў, дабавіць больш гульнявой айдэнцікі ўнутры салона.

"У першую чаргу мы працуем для нашых пасажыраў і ў адпаведнасці з іх пажаданнямі і чаканнямі. Першы "танкалёт" быў настолькі цёпла ўспрыняты пасажырамі і спецыялістамі аэрапортаў многіх краін, што мы не маглі завяршыць праект. Таму сёння мы прэзентуем не толькі новае брэндзіраванае паветранае судна, але і рады аб`явіць, што ў парку таксама застанецца самалёт, прэзентаваны ў 2016 годзе, гэта значыць цяпер у парку будзе два "танкалёты" - Boeing 737-300 і Embraer 195. Мы спадзяёмся, што палёты на ім будуць для пасажыраў стартам новых, заўсёды займальных і цікавых падарожжаў, а жыхары іншых краін дзякуючы ўнікальнай ліўрэі даведаюцца больш пра Беларусь", - адзначыў генеральны дырэктар "Белавія" Анатоль Гусараў.

Спецыяльна для новага авіялайнера падрыхтавалі абсалютна новыя гукавыя дарожкі, якія будуць гучаць у час пералёту. У афарбоўцы "танкалёта" прымалі ўдзел 22 спецыялісты, на працягу 11 дзён у фарбавальным ангары Ульянаўска (Расія) імі было выкарыстана 92 л эмалі, 115 л лаку, 62 л грунту і 600 м плёнкі.

Паветранае судна ў ліўрэі World Of Tanks будзе эксплуатавацца на працягу пяці гадоў на ўсіх лініях маршрутнай сеткі авіякампаніі "Белавія".

Першы камерцыйны палёт брэндзіраванага борта будзе зроблены па маршруце Мінск-Баку-Мінск.

12 снежня 2018, Мінск
БЕЛТА