https://www.kurs.kz/ - Курсы валют в обменных пунктах г. Алматы и других городах Казахстана
 


 




Найти
 
 


У Рэчыцы пачнуць падрыхтоўку валанцёраў па кібербяспецы


У Рэчыцы пачнуць падрыхтоўку валанцёраў па кібербяспецы, паведаміла дырэктарка Рэчыцкага цэнтра творчасці дзяцей і моладзі Святлана Чыгрынёва.
Праект рэчыцкіх ініцыятараў "Валанцёры кібербяспекі" стаў адным з пераможцаў конкурсу моладзевых ініцыятыў, арганізаванага БРСМ пры падтрымцы Міністэрства адукацыі.

Ідэя накіравана на павышэнне інфармацыйнай дасведчанасці ў навучэнцаў і моладзі праз правядзенне навучальных семінараў для моладзі, а таксама фарміраванне медыядасведчанасці ў дзяцей дашкольнага і малодшага школьнага ўзросту, грамадзян старэйшага пакалення. На рэалізацыю ініцыятывы выдзелена Br5 тыс.

"Перамога ў гэтым конкурсе - заслуга ўсяго калектыву. Над праектам працавала вялікая творчая каманда. Рэчыцкі раённы савет грамадскага аб`яднання БРПА ў супрацоўніцтве з БРСМ, з удзельнікамі з Рэчыцкага падлеткавага парламента абмяркоўваў ідэю яшчэ ў пачатку навучальнага года. Потым мы яе адшліфоўвалі. Перамога стала прыемнай нечаканасцю. Вельмі прыемна, што ўсё недарэмна, што нас заўважылі. Значнасць нашага праекта відавочная", - расказала Святлана Чыгрынёва.

Актуальнасць праекта прадыктавана рэаліямі часу. Значная частка злачынстваў учыняецца з выкарыстаннем IT-тэхналогій.

"Часцей за ўсё ад кібермахляроў церпяць пажылыя людзі, якія не вельмі добра ведаюць інтэрнэт, а таксама дзеці, у якіх нядаўна з`явіўся тэлефон і яны могуць адказаць на мабільныя атакі хакераў. Нягледзячы на тое што пра гэта шмат гавораць і пішуць, праблема застаецца актуальнай. Таму наш праект накіраваны на інфармацыйную асвету па пытаннях інтэрнэт-бяспекі пажылых людзей і дзяцей дашкольнага і малодшага школьнага ўзросту, якія недастаткова знаёмыя з камп`ютарнымі тэхналогіямі. Да таго ж важна фарміраванне медыядасведчанасці з ранняга ўзросту", - удакладнілі ў цэнтры творчасці.

Валанцёрамі кібербяспекі будуць падлеткі і моладзь. Яны пройдуць двухмесячнае навучанне, азнаёмяцца з заканадаўствам у частцы кіберзлачынстваў, навучацца самі ствараць інфармацыйныя прадукты: лістоўкі, буклеты і інш.

"Ёсць меркаванне, што папяровыя носьбіты цяпер неактуальныя. Але для старэйшага пакалення гэта аптымальны варыянт. Іх плануем распаўсюджваць па паштовых скрынях або пры асабістых гутарках. Паралельна расказваць, што нельга адказваць на званкі махляроў, якія прадстаўляюцца работнікамі інтэрнэт-банкаў. Такія званкі часцей за ўсё паступаюць у мэсэнджарах. Пра гэта важна і трэба расказваць", - падкрэслілі ў Рэчыцкім цэнтры творчасці дзяцей і моладзі.

Валанцёры будуць навучацца, ствараць лістоўкі, сюжэты для білбордаў, відэаролікі, распрацоўваць арыгінальныя гульні для дзяцей. У далейшым падлеткі і самі будуць распаўсюджваць інфармацыю ў сваіх школах, на месцах, праводзіць майстар-класы, інфармацыйныя сустрэчы па кібербяспецы для розных катэгорый людзей анлайн або афлайн.

На выдзеленыя сродкі ў цэнтры плануюць набыць каляровы прынтар і функцыянальны ноўтбук. "Асноўная база ў нас ёсць, таму будзе дастаткова гэтага абсталявання, каб стварыць гульні або лістоўкі. Мы валодаем асновамі графічнага дызайну. Таксама пачынаем распрацоўку адукацыйных модуляў", - падзялілася кіраўнік.

Першапраходцамі стануць каля 30 маладых людзей. Праект стартуе з чэрвеня, як толькі будуць выкананы ўсе юрыдычныя моманты, створана праграма навучання.

Праект прадугледжвае супрацоўніцтва з рознымі ведамствамі, уключаючы адукацыю, АУС. На перспектыву як прадаўжэнне ініцыятывы разглядаюць стварэнне фарміравання або гуртка па інтарэсах.

Конкурс моладзевых ініцыятыў стартаваў у лістападзе 2021 года. Ён праводзіцца для ацэнкі і адбору праектаў, накіраваных на ўключэнне моладзі ў творчую дзейнасць і сацыяльную практыку, павышэнне грамадзянскай актыўнасці, раскрыццё патэнцыялу моладзі ў адпаведнасці з асноўнымі прыярытэтамі Стратэгіі развіцця дзяржаўнай моладзевай палітыкі Рэспублікі Беларусь да 2030 года.

Як расказалі ў Гомельскай абласной арганізацыі БРСМ, ад паўднёва-ўсходняга рэгіёна краіны экспертнаму савету было накіравана 48 праектаў.

21 красавіка 2022, Гомель
БЕЛТА
 
Дата публикации:21.04.2022
Тематика:Бизнес, Образование в Беларуси
Просмотров:649
 
Ключевые слова:
Кибербезопасность Волонтёры БРСМ Рэчыца Гомельшчына
 
 


Комментарии



 



Другие новости по этой теме