Ва Універсітэт грамадзянскай абароны МНС на шэраг спецыяльнасцей можна паступіць без экзамену. Адпаведная пастанова Міністэрства па надзвычайных сітуацыях апублікавана на Нацыянальным прававым інтэрнэт-партале.
Вызначаны дзве спецыяльнасці, куды абітурыенты могуць падаць дакументы без уступных экзаменаў: "Папярэджанне і ліквідацыя надзвычайных сітуацый" і "Пажарная і прамысловая бяспека". Але і тут ёсць шэраг умоў.
Такія прывілеі ёсць у выпускнікоў Спецыялізаванага ліцэя пры Універсітэце грамадзянскай абароны МНС, Спецыялізаванага ліцэя МУС і кадэцкіх вучылішчаў. Пры гэтым навучальную ўстанову абітурыенты павінны скончыць у год паступлення з адзнакамі сем і вышэй балаў па ўсіх прадметах навучальнага плана.
На астатнія месцы па-за конкурсам пасля залічэння без экзаменаў могуць паступіць тыя ж выпускнікі Спецыялізаванага ліцэя пры Універсітэце грамадзянскай абароны МНС, Спецыялізаванага ліцэя МУС і кадэцкіх вучылішчаў, калі ў іх у атэстаце ацэнкі па прадметах уступных экзаменаў не ніжэй за шэсць балаў.
