Беларуская тэнісістка Арына Сабаленка выйшла ў чвэрцьфінал адкрытага чэмпіянату Аўстраліі, які праходзіць у Мельбурне.
У матчы чацвёртага круга Australian Open Сабаленка абыграла швейцарку Белінду Бенчыч.
Тэнісісткі правялі на корце 1 гадзіну 27 хвілін, матч скончыўся з лікам 7:5, 6:2 на карысць пасеянай пад пятым нумарам беларускі.
Наступнай саперніцай Сабаленкі стане харватка Донна Векіч.
Векіч згуляе ў чвэрцьфінале турніру Вялікага шлема пасля US Open-2019 другі раз у кар’еры, Сабаленка – у першы. Лепшым вынікам беларускі на турнірах Вялікага шлема раней быў выхад у паўфінал на Уімблдоне (2021) і US Open (2021, 2022).
На турніры акрамя Сабаленкі, выступаюць беларускі Аляксандра Сасновіч і Вікторыя Азаранка.
Напярэдадні Азаранка таксама выйшла ў чвэрцьфінал Australian Open, перамогшы кітаянку Чжу Лінь. Наступнай саперніцай беларускі стане трэцяя ракетка свету амерыканка Джэсіка Пегула.
Раней Азаранка двойчы выйгравала Адкрыты чэмпіянат Аўстраліі – у 2012 і 2013 гадах.
Сабаленка і Азаранка могуць згуляць адна супраць адной – але толькі калі дойдуць да фіналу.
Сасновіч жа выбыла ў 1/32 фіналу адзіночнага разраду, саступіўшы Пегуле. Пры гэтым яна працягвае паспяхова выступаць у парным разрадзе.
Australian Open, прызавы фонд якога ў гэтым годзе складае 51,5 млн долараў, завершыцца 29 студзеня.
