— Сёння ў нас чарговае пасяджэнне аргкамітэта. Не так шмат застаецца часу да святкавання 80-годдзя Вялікай Перамогі. Многія пытанні ўжо вырашаны, падыходы да правядзення мерапрыемства падтрыманы і адобраны кіраўніком дзяржавы. Прынята пастанова ўрада аб аказанні матэрыяльнай дапамогі (ветэранам.), — нагадаў прэм’ер-міністр.

Таму ён акцэнтаваў увагу выступоўцаў на неабходнасці агучыць пытанні, якія не вырашаны, і пазначыць, што неабходна для іх вырашэння.

— Я б хацеў пачуць, як ідуць работы па падрыхтоўцы выстаўкі, прысвечанай 80-годдзю Вялікай Перамогі, — дадаў ён.

Дэталямі з журналістамі падзяліўся памочнік міністра абароны ў ідэалагічнай рабоце ва Узброеных Сілах — начальнік Галоўнага ўпраўлення ідэалагічнай работы Мінабароны, генерал-маёр Леанід Касінскі:

— Упершыню грамадзяне на парадзе ўбачаць дастаткова шырокую лінейку менавіта рэтрапарада, гістарычнай яго часткі з удзелам розных узораў узбраення, ваеннай тэхнікі ваенных гадоў.

Паводле яго слоў, у цяперашні час шыецца форма адзення ваенных гадоў для ўдзельнікаў парада, якія будуць прымаць удзел непасрэдна ў яго гістарычнай частцы:

— Рыхтуецца тэхніка, прыбылі з Расійскай Федэрацыі танкі Т-34, якія будуць браць непасрэдны ўдзел у гістарычнай частцы парада. Актыўна ўзаемадзейнічаем з прадстаўнікамі малога бізнесу, і, павінен адзначыць, яны на бязвыплатнай аснове даюць наяўныя ў іх ўзоры тэхнікі, узбраення менавіта часоў Вялікай Айчыннай вайны для таго, каб прадставіць шырокай грамадскасці ў ходзе правядзення ваеннага парада.

Першы намеснік міністра культуры Дзмітрый Шляхцін дадаў, што актыўная фаза рэпетыцыйнага працэсу парада, якая будзе бачная грамадскасці, пачнецца з красавіка.

— Усе рашэнні, неабходныя для арганізацыі правядзення цэнтральных мерапрыемстваў, прысвечаных 80-годдзю Перамогі савецкага народа ў Вялікай Айчыннай вайны, ужо прыняты. Цяпер мы актыўна працуем над іх рэалізацыяй, — акцэнтаваў увагу ён.

Што датычыцца Беларускага дзяржаўнага музея гісторыі Вялікай Айчыннай вайны, яго асноўная задача, па словах першага намесніка міністра, — арганізацыя гістарычнага блока выстаўкі на плошчах Мінскага міжнароднага выставачнага цэнтра:

— Тут работа таксама ідзе досыць інтэнсіўна. Будуць маленькія сюрпрызы, таму што гэта чакаецца не зусім звыклая музейная экспазіцыя, якую мы бачылі ў самім музеі вайны. Будзе выстаўка, насычаная рознымі інтэрактыўнымі мультымедыйнымі тэхналогіямі, якія спецыяльна ствараюцца для яе, у тым ліку кантэнт.

Першы намеснік міністра культуры растлумачыў, што гэта тое, чаго раней нідзе не было:

— Мы з дапамогай тэхналогій нават ажывім аднаго героя партызанскага руху на тэрыторыі Рэспублікі Беларусь, таму што раней мы яго ведалі толькі на фотаздымках, а цяпер з’явіцца магчымасць убачыць яго ў выглядзе галаграмы.

Звязда, 27 сакавіка 2025