У 1942—1944 гадах на гэтым месцы расстрэльвалі савецкіх грамадзян, аднак дагэтуль яно ніяк не было пазначанае. 

Паводле слоў сябра КХП-БНФ Яна Дзяржаўцава, які і прапанаваў паставіць крыж, гэтая ідэя з`явілася ў яго пасля сустрэч з мясцовымі жыхарамі. "Я шукаў сведкаў або тых, хто чуў пра сталінскія рэпрэсіі ў Віцебскім раёне. Распытваў жыхароў наваколля, бліжэйшага да вёскі Хайсы, дзе былі знойдзеныя чалавечыя астанкі. Паводле старажылаў Хайсоў, каля іхнай вёскі і адбываліся "сталінскія расстрэлы". А вось жыхары суседняй вёскі Бараўляны расказалі мне пра расстрэлы часу Вялікай Айчыннай вайны", — паведаміў Дзяржаўцаў. 

Месца расстрэлу беларусаў фашыстамі паказала мясцовая жыхарка Лідзія Сухадольская. 

Крыж быў усталяваны за 200 метраў ад аўтадарогі Р115, якая вядзе з Віцебска ў Гарадок, недалёка ад вясковых могілак, за пару дзясяткаў метраў ад бярозы, якую добра памятае мясцовая жыхарка. 

"Зрэшты, пра гэтае месца ведалі і ведаюць многія вяскоўцы. Аднак дагэтуль тут не было аніякага знаку, які сведчыў бы пра яшчэ адну трагедыю часоў Вялікай Айчыннай вайны", — зазначыў Дзяржаўцаў.

Андрэй Серада, БелаПАН
Мінск, 6 снежня 2015