20 кастрычніка ў Кіеве быў адкрыты помнік класіку беларускай літаратуры Уладзіміру Караткевічу, паведамляе прэс-служба Міністэрства культуры Беларусі.
Ва ўрачыстай цырымоніі прынялі ўдзел міністры культуры Беларусі і Украіны Павел Латушка і Міхаіл Кулыняк, дзеячы культуры і мастацтва дзвюх краін.
Павел Латушка адзначыў, што Уладзімір Караткевіч адыграў вялікую ролю ў беларускай культуры: ён даў беларусам разуменне таго, што беларускі народ мае багатую гісторыю, якая з`яўляецца часткай еўрапейскай гісторыі.
Паводле слоў міністра, помнік фактычна стане сімвалам яднання беларускага і ўкраінскага народаў.
Латушка таксама падкрэсліў вялікі ўплыў украінскай культуры на творчасць Уладзіміра Караткевіча. "У сваіх шматлікіх мастацкіх творах і літаратуразнаўчых артыкулах пісьменнік звяртаўся да ўспамінаў пра жыццё на Украіне, даследаваў творчасць Тараса Шаўчэнкі, Лесі Украінкі, Івана Франка і іншых", —сказаў ён.
Як нагадвае прэс-служба Міністэрства культуры, помнік Уладзіміру Караткевічу ў Кіеве ўзведзены ў мэтах выканання дамоўленасці прэзідэнтаў Беларусі і Украіны. Помнік створаны беларускімі скульптарамі Канстанцінам Селіханавым, Алегам Варвашэнем і архітэктарам Аляксандрам Корбутам.
Фінансаванне работ па стварэнні помніка ажыццяўлялася за кошт сродкаў рэзервовага фонду прэзідэнта Беларусі. Работы па ўсталяванні помніка ў Кіеве і добраўпарадкаванні прылеглай тэрыторыі ажыццяўляліся за сродкі кіеўскай мэрыі.
БелаПАН20 кастрычніка 2011
