Дзяржаўны камітэт па навуцы і тэхналогіях (ДКНТ) Беларусі і Міністэрства адукацыі і навукі Латвіі праводзяць конкурс навукова-тэхнічных праектаў на 2014—2015 гады.
Як паведамляе прэс-служба ДКНТ, дакументы на конкурс прымаюцца да 15 чэрвеня 2013 года.
Конкурс навукова-тэхнічных праектаў праводзіцца ў адпаведнасці з міжведамасным пагадненнем аб навукова-тэхнічным супрацоўніцтве, якое было падпісана 27 кастрычніка 2006 года.
У 2012—2013 гадах рэалізуецца чатыры беларуска-латвійскія праекты, выканаўцамі якіх з`яўляюцца восем навуковых арганізацый, па чатыры з кожнага боку.
Тэматыка праектаў — распрацоўка нанаматэрыялаў з новымі ўласцівасцямі, стварэнне біяпрэпаратаў для сельскай гаспадаркі, даследаванне экалагічных аспектаў трансгранічных рэк і ўдасканаленне эканоміка-прававых асноў двухбаковага супрацоўніцтва ў сферы эфектыўнага выкарыстання мінеральнай сыравіны.
Кошт аднаго праекта ацэньваўся ў сярэднім у 15-20 тысяч еўра. Падтрымка беларускіх выканаўцаў сумесных праектаў ажыццяўлялася праз Беларускі рэспубліканскі фонд фундаментальных даследаванняў.
Для ўдзелу ў конкурсе неабходна падаць у ДКНТ заяўку на ўдзел у сумесным праекце, а таксама камплект заяўнічых форм для праектаў прыкладнога ці фундаментальнага характару адпаведна.
Парадак падачы і разгляду дакументаў будзе ажыццяўляцца ў адпаведнасці з Палажэннем аб навукова-тэхнічных праектах, выкананых у межах міжнародных дагавораў Беларусі.
БелаПАНМінск, 21 красавіка 2013
