Паводле слоў Аляксандра Ярашэнкі, па выніках мінулага года дасягнуты істотнае зніжэнне ўзроўню інфляцыі, стабілізацыя абменнага курсу беларускага рубля, дадатнае сальда знешняга гандлю, павелічэнне сальда гандлёвага балансу. "Нараўне з добрымі знакавымі момантамі былі падлічаны і недапрацоўкі ў развіцці эканомікі", - адзначыў намеснік міністра.

Тэмп росту ВУП у 2012 годзе склаў 101,5 працэнта. Нявыхад на гадавы прагнозны параметр па гэтым паказчыку Аляксандр Ярашэнка растлумачыў тым, што рэалізоўвалася палітыка, накіраваная на ліквідацыю ўтвораных у папярэднім годзе макраэканамічных дыспрапорцый. Таму асноўныя намаганні былі накіраваны на забеспячэнне менавіта збалансаванага эканамічнага росту, падкрэсліў ён.

Асноўны ўплыў на эканамічны рост у 2012 годзе аказала прамысловасць, яе ўклад у прырост ВУП склаў 1,8 працэнта. Уклад сельскай гаспадаркі, а таксама транспарту і сувязі ў прырост ВУП склаў па 0,5 працэнта, чыстыя падаткі - 0,4 працэнта.

Разам з тым тэмп росту прамысловай вытворчасці дасягнуў 105,7 працэнта. Да прагнознага паказчыка прамысловасць таксама не дацягнула. Асноўнымі фактарамі росту ў прамысловасці сталі высокія аб`ёмы вытворчасці ў нафтаперапрацоўцы - 117,2 працэнта, хімічнай прамысловасці - 119,6 працэнта, у вытворчасці транспартных сродкаў і абсталявання - 114,9 працэнта.

Намеснік міністра эканомікі паведаміў, што было прааналізавана 598 пазіцый па таварах-прадстаўніках. Высветлілася, што гэтыя тавары складаюць прыкладна 30 працэнтаў дабаўленай вартасці ў прамысловасці. Прыкладна 62 працэнты гэтых тавараў у фізічным аб`ёме спрацавалі на плюс. Забяспечаны рост аб`ёмаў вытворчасці шын - 110 працэнтаў, кар`ерных самазвалаў - 117,1 працэнта, грузавых аўтамабіляў - амаль 118 працэнтаў, мэблі - 170 працэнтаў, матацыклаў - 174,5 працэнта.

Нараўне з гэтым ёсць пазіцыі, вытворчасць якіх у фізічным аб`ёме ў мінулым годзе знізілася. У прыватнасці, гэта датычыцца сырой нафты. "Мы не змаглі выйсці на ўзровень 2011 года", - сказаў Аляксандр Ярашэнка. Сур`ёзна знізілі пазіцыі тэкстыльная і швейная вытворчасць. Тое ж закранула вытворчасць скуры і абутку. "Пры разліку і індэкса прамысловай вытворчасці, і валавога ўнутранага прадукту, калі былі значныя інфляцыйныя ўзрушэнні ў 2011 годзе, мы пастараліся максімальна аб`ектыўна паглядзець, ці сапраўды эканоміка прырастала або зніжала свой рост за кошт інфляцыйнага складальніка, або ўсё ж такі ёсць эканамічны складальнік, вымераны ў натуральных велічынях", - сказаў намеснік міністра.

21 студзеня 2013, Мінск
БЕЛТА