Савет Еўразійскай эканамічнай камісіі зацвердзіў абноўлены адзіны мытны тарыф (АМТ), які пачне дзейнічаць у краінах Мытнага саюза з моманту далучэння Расіі да Сусветнай гандлёвай арганізацыі (СГА).
Як перадае РІА Новости, пра гэта паведаміў журналістам 20 ліпеня ў Маскве старшыня савета Сяргей Румас.
"Еўразійская эканамічная камісія ў асобе савета завяршыла працу над змененым мытным тарыфам, звязаным з уваходжаннем Расіі ў СГА, і ўсе неабходныя рашэнні былі намі прынятыя", — сказаў Румас па выніках пасяджэння савета.
Як паведаміла затым РІА Новости крыніца ў камісіі, тарыф зацверджаны, але будуць дзейнічаць прыкладна 120 выключэнняў (тарыфы па шэрагу пазіцый, якія будуць дзейнічаць у Беларусі і Казахстане, адрозныя ад АМТ).
Паводле яго слоў, да іх адносяцца пошліны на аўтамабілі, якія ў тым ліку будуць адрознівацца з-за ўвядзення ў РФ утылізацыйнага збору.
Як раней паведамляў кіраўнік Мінэканамразвіцця РФ Андрэй Белавусаў, пасля ўваходжання Расіі ў СГА ў сярэднім узровень тарыфнай абароны паступова знізіцца на 3,5%. Цяпер сярэднеўзважаны тарыф складае 9,5%, у 2013 годзе ён знізіцца да 7,6%, у 2014-м — да 6,9%, а ў 2015 годзе складзе прыкладна 6%.
РІА Новости нагадвае, што Савет Федэрацыі 18 ліпеня ратыфікаваў пратакол аб далучэнні Расіі да СГА. Пратакол аб далучэнні РФ да Маракешскага пагаднення аб заснаванні СГА быў падпісаны ў Жэневе 16 снежня 2011 года. Ратыфікацыя прадугледжвае, што Расія ў якасці дзяржавы — члена СГА прымае на сябе ўсе абавязацельствы па Маракешскім пагадненні аб заснаванні гэтай арганізацыі. Пераходныя перыяды для лібералізацыі доступу на рынак складаюць два-тры гады, па найболей адчувальных таварах — пяць-сем гадоў.
Акрамя таго, паводле слоў Румаса, савет прыняў чатыры тэхнічныя рэгламенты, два з якіх — "Аб бяспецы выбуховых рэчываў і вырабаў на іх аснове" і "Патрабаванні бяспекі харчовых дабавак, араматызатараў і тэхналагічных дапаможных сродкаў" — былі падрыхтаваны казахстанскім бокам. Тэхрэгламент "Аб патрабаваннях да змазваючых матэрыялаў, маслаў і спецыяльных вадкасцяў" — расійскім бокам, тэхрэгламент "Аб бяспецы сельскагаспадарчых і лесагаспадарчых трактароў і прычэпаў да іх" — беларускім бокам.
Як растлумачыў міністр АЭК па тэхнічным урэгуляванні Валерый Карашкоў, гэтыя тэхнічныя рэгламенты пачнуць дзейнічаць у 2013—2015 гадах і такі працяглы пераходны перыяд дапаможа падрыхтавацца да іх ўвядзення па адпаведных галінах прамысловасці.
Марына Носава,
БелаПАНМінск, 20 ліпеня 2012
