Аляксандр Лукашэнка прыбудзе ў нядзелю з афіцыйным візітам у Гавану, дзе правядзе перамовы з кубінскім лідарам Раулем Кастра.
У панядзелак, 25 чэрвеня, беларускі прэзідэнт ускладзе вянок да мемарыяла Хасэ Марці, нацыянальнага героя Кубы, пасля чаго пройдуць афіцыйныя перамовы. Вечарам у панядзелак Лукашэнка пакіне Кубу, перадае РІА Новости са спасылкай на афіцыйныя паведамленні.
Адносіны Кубы і Беларусі прадстаўнікі абедзвюх краін характарызуюць як "цудоўныя", адзначаючы патэнцыял іх развіцця ў эканамічнай, гандлёвай, навуковай сферах і ў галіне аховы здароўя. Паводле афіцыйных звестак, тавараабарот паміж краінамі перавышае 50 млн. долараў.
Гавану і Мінск вызначае агульнасць падыходаў да асноўных праблем міжнароднага парадку дня. У маі гэтага года Куба і Беларусь адзначылі 20 гадоў з дня ўстанаўлення дыпламатычных адносінаў.
Нагадаем, акрамя Кубы на наступным тыдні Аляксандр Лукашэнка наведае з афіцыйнымі візітамі Венесуэлу і Эквадор.
БелаПАНМінск, 24 чэрвеня 2012
