30 сакавіка была завершана праца інспектараў Дзяржаўнай ветэрынарнай і фітасанітарнай службы Украіны па правядзенні аўдыту сістэмы дзяржаўнага кантролю пры вытворчасці малочных і мясных прадуктаў у Беларусь. Узгодненая бакамі праграма інспекцыі выканана ў поўным аб`ёме, адзначаецца ў паведамленні.

Украінскія спецыялісты вывучылі працу РУП "Навукова-практычны цэнтр гігіены" Міністэрства аховы здароў, ДУ "Беларускі дзяржаўны ветэрынарны цэнтр" Мінсельгасхарча, некаторых упраўленняў ветэрынарыі камітэтаў па сельскай гаспадарцы і харчаванні аблвыканкамаў і дзяржаўнай ветэрынарнай службы Уздзенскага і Гомельскага раёнаў. Акрамя гэтага, наведалі перапрацоўчыя прадпрыемствы ААТ "Слуцкі сыраробны камбінат", ЗП "Інка-Фуд", ААТ "Савушкін прадукт", ААТ "Бярозаўскі сыраробны завод", ААТ "Бярозаўскі мясакансервавы камбінат", ААТ "Беллакт", ААТ "Ваўкавыскі мясакамбінат", ААТ "Малочныя прадукты" (Гомель), ААТ "Гомельскі мясакамбінат", а таксама сельскагаспадарчыя арганізацыі СГК ЗАТ "Вітэкс" Уздзенскага раёна, СВК "Астрамечава" Брэсцкага раёна, СВК "Міжлессе" Бярозаўскага раёна, КСУП "Брылёва" Гомельскага раёна.

Беларускі бок адзначае, што "рашэнне аб зняцці абмежаванняў на ўвоз ва Украіну беларускай мяса-малочнай прадукцыі па выніках аўдыту будзе прымацца Дзяржаўнай ветэрынарнай і фітасанітарнай службай Украіны ва ўстаноўленым парадку, аб чым беларускаму боку будзе паведамлена па дыпламатычных каналах".

Нагадаем, Украіна 1 сакавіка часова прыпыніла ўвоз на сваю тэрыторыю з Беларусі жывёл, а таксама мясной прадукцыі з-за апасення распаўсюджвання афрыканскай чумы свіней. Таксама з-за сістэматычных парушэнняў, па заяве ўкраінскага боку, ветэрынарна-санітарных патрабаванняў (перавышэнне максімальна дапушчальных узроўняў рэшткаў ветэрынарных прэпаратаў у малочных прадуктах) быў часова прыпынены ўвоз беларускага малака і малочных прадуктаў. Украінскі бок заяўляе, што абмежаванні звязаны не з якасцю прадукцыі, а з яе бяспекай.

На сустрэчы кіраўнікі Дзяржветфітаслужбы Украіны Івана Бісюка і галоўнага дзяржаўнага ветэрынарнага інспектара Беларусі Юрыя Піваварчыка, якая прайшла ў Кіеве 2—3 сакавіка, беларускі бок быў праінфармаваны аб выяўленых фактах. Пры гэтым галоўнаму дзяржветінспектару Беларусі быў перададзены пералік пытанняў, аператыўны адказ на якія павінен быў паскорыць вырашэнне праблемы.

"Лічым, што найхутчэйшае ўрэгуляванне праблемных пытанняў, якія ўзніклі ў частцы паставак беларускай мяса-малочнай прадукцыі ва Украіну, наўпрост залежыць ад эфектыўнага дыялогу паміж ветэрынарнымі службамі абедзвюх дзяржаў і аператыўнага рэагавання на ўзаемныя запыты", — гаварылася ў заяве Дзяржветслужбы Беларусі, распаўсюджанай 14 сакавіка.

Марына Носава, БелаПАН
Мінск, 31 сакавіка 2012