Банкаўская сістэма Беларусі працуе стабільна. Пра гэта Аляксандру Лукашэнку 16 студзеня падчас рабочай сустрэчы паведаміла старшыня праўлення Нацыянальнага банка Надзея Ермакова.
Як паведамляе прэс-служба кіраўніка дзяржавы, Лукашэнка пацікавіўся тым, як развіваецца сітуацыя на фінансавых рынках, якія асноўныя тэндэнцыі канца мінулага і пачатку гэтага года. "Розныя былі меркаванні, размовы пра тое, што мы тут ледзь ці не палітыку збіраемся мяняць у фінансавай сферы. Розных чутак хапала правакацыйных. Паводле маіх звестак, Нацыянальны банк і ўрад з годнасцю прайшлі гэты перыяд. І, як паказаў час, чуткі гэтыя былі нічым не абгрунтаваныя", — зазначыў кіраўнік дзяржавы.
"Золатавалютныя рэзервы ў нас упершыню ў гісторыі дастатковыя для таго, каб сёння любы курс нацыянальнай валюты падтрымліваць. Але ён павінен быць абгрунтаваным, разумным, як мы дамаўляліся, і абавязкова свабодным", — падкрэсліў Лукашэнка.
Надзея Ермакова паведаміла афіцыйнаму лідару, што сітуацыя на валютнай біржы і ў банкаўскай сістэме ў цэлым складваецца нядрэнная. Па стане на 1 студзеня 2012 года сфарміраваны золатавалютныя рэзервы ў 7,9 млрд. долараў па міжнародных стандартах.
Паводле слоў Ермаковай, ліквіднасць у банкаўскай сістэме знаходзіцца ў норме, росту праблемных крэдытаў не назіраецца, банкі і плацежная сістэма працуюць устойліва і без збояў. На наяўным рынку сітуацыя таксама спакойная. Насельніцтва прадае ў дзень на 5-7 млн. валюты ў доларавым эквіваленце больш, чым купляе. "У эканоміцы склалася сітуацыя, калі яна забяспечвае сама сябе без дадатковай падтрымкі банкаўскай сістэмы", — канстатавала кіраўнік Нацбанка.
Лукашэнка даручыў падтрымліваць устойлівую працу банкаўскага сектара Беларусі.
Аляксей Арэшка,
БелаПАНМінск, 16 студзеня 2012
