Упраўленне дэпартамента фінансавых расследаванняў Камітэта дзяржкантролю па Брэсцкай вобласці сумесна з в/ч 2187 падчас правядзення аператыўна-вышуковых мерапрыемстваў канфіскавала кантрабандны тавар. Як паведаміла прэс-служба КДК, устаноўлены факты незаконнага ўвозу ў краіну вясельных сукенак замежнай вытворчасці, аксесуараў да іх, а таксама трыкатажнага адзення.
Гэта прадукцыя была выяўлена ў цягніку Брэст — Новасібірск. У тамбуры вагона знаходзіліся чатыры буйнагабарытныя сумкі, у якіх было каля 150 вясельных сукенак коштам больш за 180 млн. рублёў. У тамбуры другога вагона супрацоўнікі фінансавай міліцыі канфіскавалі тры буйнагабарытныя сумкі, у якіх знаходзіліся насценныя кручкі з клейкай паверхняй, металічныя і пластыкавыя ланцугі замежнай вытворчасці. Яшчэ адна партыя кантрабанднага тавару была знойдзена ў трэцім вагоне: тут аператыўнікі канфіскавалі шэсць чорных поліэтыленавых пакетаў з жаночым адзеннем. Агульны кошт выяўленых матэрыяльных каштоўнасцяў склаў 434 млн. рублёў.
Гаспадары тавару не былі ўстаноўлены. Па факце затрымання матэрыяльных каштоўнасцяў праводзіцца праверка.
Марына Носава,
БелаПАНМінск, 29 ліпеня 2011
