У Еўразійскай эканамічнай камісіі канстатавалі паляпшэнне сітуацыі з інфляцыяй у Беларусі. Аб гэтым гаворыцца ў паведамленні прэс-службы ЕЭК па выніках двухбаковых кансультацый прадстаўнікоў камісіі і ўпаўнаважаных органаў Беларусі. Бакі абмеркавалі мэтазгоднасць падрыхтоўкі рэкамендацый, накіраваных на ўстараненне перавышэння колькаснага значэння ўзроўню інфляцыі (індэкса спажывецкіх цэн), у сувязі з перавышэннем у I і II кварталах 2015 года паказчыка, устаноўленага дагаворам аб ЕАЭС.

"Па выніках мерапрыемства прадстаўнікі ўпаўнаважаных органаў Беларусі і Еўразійскай эканамічнай камісіі прынялі ўзгодненае рашэнне аб адсутнасці падстаў для падрыхтоўкі рэкамендацый, накіраваных на забеспячэнне выканання колькаснага значэння ўзроўню інфляцыі, у сувязі з паляпшэннем сітуацыі ў Беларусі ў жніўні-верасні 2015 года", - праінфармавалі ў ЕЭК.

Двухбаковыя кансультацыі праводзіліся ў рамках рэалізацыі парадку распрацоўкі і прыняцця мер, накіраваных на стабілізацыю эканамічнай сітуацыі ў выпадку перавышэння дзяржавамі - членамі Мытнага саюза і Адзінай эканамічнай прасторы колькасных значэнняў макраэканамічных паказчыкаў, якія вызначаюць устойлівасць эканамічнага развіцця.

У мерапрыемстве прынялі ўдзел супрацоўнікі структурных падраздзяленняў Еўразійскай эканамічнай камісіі і прадстаўнікі Нацыянальнага банка, Міністэрства эканомікі і Міністэрства гандлю Беларусі.

Удзельнікі кансультацый абмеркавалі прычыны росту інфляцыі (індэкса спажывецкіх цэн), уклад у яго асноўных кампанентаў і фактары, што ўплываюць на рост гэтага паказчыка. Таксама разгледжаны нацыянальныя меры, што прымаюцца ўрадам і Нацыянальным банкам Беларусі, і меры па зніжэнні ўзроўню інфляцыі, рэкамендуемыя Міжнародным валютным фондам.

Па выніках двухбаковых кансультацый падпісаны адпаведны пратакол.

2 кастрычніка 2015, Масква
Эдуард Півавар - БЕЛТА