Сусветны банк (СБ) прагназуе ў 2012 годзе падзенне тэмпаў росту ВУП Беларусі да 0,5%. Гэтая лічба ўтрымліваецца ў апублікаваным 18 студзеня штогадовым дакладзе СБ "Глабальныя эканамічныя перспектывы на 2012 год".
Між тым, згодна з зацверджаным Прагнозам сацыяльна-эканамічнага развіцця Беларусі на 2012 год, рост ВУП павінен скласці 5-5,5%.
У 2013 годзе прырост ВУП у Беларусі, паводле ацэнкі СБ, складзе 3,5%.
На думку экспертаў Сусветнага банка, "сусветная эканоміка ўвайшла ў небяспечную фазу". "Фінансавыя ўзрушэнні ў Еўропе часткова распаўсюдзіліся на краіны, якія сталі на шлях развіцця, і іншыя краіны, у тым ліку з высокім узроўнем даходаў, што да нядаўняга часу заставаліся некранутымі. Гэтае разрастанне крызісных з`яў прывяло да павышэння кошту пазычанняў у многіх рэгіёнах свету і прывяло да падзення індэксаў на фондавых рынках, пры гэтым прыток капіталу ў краіны, якія сталі на шлях развіцця, рэзка скараціўся. Еўропа, па ўсёй бачнасці, увайшла ў рэцэсію", — гаворыцца ў дакладзе.
У сувязі з рэцэсіяй у еўразоне СБ знізіў прагноз росту сусветнай эканомікі ў 2012 годзе з 3,6% (гэтая лічба называлася банкам мінулым летам) да 2,5%.
Зніжаны і прагноз эканамічнага росту для Расіі — з 4,2% да 3,5%.
Некаторыя краіны еўрапейскага рэгіёну, адзначаецца ў дакладзе, сутыкнуцца з праблемамі інвеставання — як знешняга, так і ўнутранага. "У выпадку значнага пагаршэння кан`юнктуры патокі замежнага капіталу могуць яшчэ больш аслабнуць, а кошт пазычанняў можа рэзка ўзрасці", — лічаць эксперты СБ.
Як адзначаецца ў дакладзе, "перад такім сцэнарыем узмацнення жорсткасці фінансавых умоў асабліва ўразлівыя краіны з высокім узроўнем кароткатэрміновай запазычанасці або доўгатэрміновай запазычанасці з блізкім тэрмінам пагашэння, а таксама краіны з вялікім дэфіцытам рахунку бягучых аперацый".
Асаблівую ўразлівасць у гэтым плане, на думку экспертаў СБ, "дэманструе Турцыя, якая мае вялікі дэфіцыт рахунку бягучых аперацый і значны аб`ём кароткатэрміновых даўгоў адносна велічыні сваіх рэзерваў". "Беларусь і Чарнагорыя таксама ўразлівыя перад замарожваннем крэдытавання на глабальных рынках, роўна, як і Грузія, Балгарыя і Румынія, у якіх вялікія аб`ёмы кароткатэрміновай запазычанасці", — лічаць аўтары даклада. "У гэтым кантэксце перспектывы ўяўляюцца вельмі няпэўнымі", — падкрэсліваюць яны.
Марына Носава,
БелаПАНМінск, 18 студзеня 2012
