Намесьнік міністра замежных спраў Беларусі Аляксандар Гур`янаў заявіў, што перамоўны працэс аб далучэньні Беларусі да Ўсясьветнай гандлёвай арганізацыі можа ўзнавіцца сёлета ў сьнежні альбо ў студзені 2012 году.
"Мы ўжо атрымалі праз палітычныя каналы інфармацыю пра тое, што для Беларусі ўжо не існуе палітычных перашкодаў для працягу перамоўнага працэсу па ЎГА"- заявіў Аляксандар Гур`янаў.
Намесьнік міністра сказаў дэпутатам, што такая пазыцыя ЗША і Эўразьвязу зьвязаная з тым, што Расея паскарае працэс уступленьня ва ЎГА.
Гур`янаў таксама паведаміў, што аднаўляе працу група, якая займаецца пытаньнем уступленьня Беларусі ва Ўсясьветную гандлёвую арганізацыю. У яе ўваходзяць прадстаўнікі 37 краін на чале з Турцыяй.
4 лістапада Палата прадстаўнікоў Нацыянальнага сходу ратыфікавала "Дамову аб функцыянаваньні Мытнага саюзу ў межах шматбаковай гандлёвай сыстэмы". Гэты дакумэнт дазваляе кожнай з трох краінаў — Расеі, Беларусі і Казахстану — далучацца да ЎГА самастойна.
"Мне падаецца, што афіцыйны Менск заўжды перабольшваў гэтыя бар`еры з боку Захаду, - мяркуе палітоляг Аляксандар Класкоўскі. - Галоўная праблема не ў пазыцыі ЗША і Эўразьвязу. І ў далучэньні да ЎГА, і наагул у інтэграцыі ўва ўсясьветную супольнасьць, калі браць шырэй, на першы плян выходзяць палітычныя і эканамічныя забабоны беларускага кіраўніцтва.
Тут мала таго, каб амэрыканцы махнулі рукой і сказалі: уступайце. Мала і таго, каб Расея пацягнула за сабою, як паравоз. Тут неабходныя пэўныя крокі, якія павінна зрабіць толькі беларускае кіраўніцтва. Калі казаць коратка, то гэта шэраг рынкавых рэформаў".
Уладзімер Глод
Радыё Свабода4 лістапада 2011
