Беларускія і польскія прамыслоўцы абмеркавалі патэнцыял экспарту беларускай прадукцыі лясной і дрэваапрацоўчай прамысловасці, а таксама развіццё супрацоўніцтва паміж профільнымі кампаніямі дзвюх краін. Перамовы з удзелам больш як 130 прадстаўнікоў прадпрыемстваў лясной і дрэваапрацоўчай прамысловасці Польшчы і Беларусі адбыліся ў Варшаве 17 студзеня.

З польскага боку ў перамовах удзельнічалі кіраўнікі і прадстаўнікі найбуйнейшых галіновых аб`яднанняў прадпрымальнікаў — Польскай гаспадарчай палаты дрэваапрацоўчай прамысловасці, Асацыяцыі вытворцаў драўняных пліт, Польскай лясной гаспадарчай палаты, а таксама Міністэрства развіцця Польшчы. З беларускага — прадстаўнікі Міністэрства лясной гаспадаркі, канцэрна "Беллеспаперапрам", ААТ "БУТБ", СЭЗ "Магілёў", Рэспубліканскай лесапрамысловай асацыяцыі, кіраўнікі і супрацоўнікі УП "Беллесэкспарт", ААТ "Беларуская лясная кампанія", ААТ "Гомельдрэў", ААТ "Фандок", ААТ "Рэчыцадрэў", ВУП "Пінскдрэў-Плайвуд", ДП "Беларусьгандаль", UAB Amkodor Baltic і інш.

Беларускія прамыслоўцы прэзентавалі экспартны патэнцыял лясной гаспадаркі, айчыннай прадукцыі машынабудавання, прызначанай для абслугоўвання лясгасаў і дрэваапрацоўчай прамысловасці.

Удзельнікі перамоў абмеркавалі асаблівасці рэалізацыі беларускіх лесаматэрыялаў, піламатэрыялаў і іншай драўнянай прадукцыі на экспарт пры дапамозе біржавога гандлю, пытанні прамысловай кааперацыі і стварэння сумесных прадпрыемстваў па выпуску прадукцыі дрэваапрацоўчай галіны на тэрыторыі СЭЗ "Магілёў". Акрамя таго, абмяркоўваліся магчымыя напрамкі для інвеставання і наяўныя пляцоўкі пад будаўніцтва прамысловых аб`ектаў з доступам да лакальнай сыравіны.

Падчас перамоў у фармаце B2B адбылося абмеркаванне пытанняў развіцця супрацоўніцтва з польскім бокам і сумесных праектаў у сферы лясной і дрэваапрацоўчай прамысловасці.

Ірына Турчына, БелаПАН
Мінск, 18 студзеня 2017