Дзяржаўныя выпрабаванні мабільнага транспартнага сродку "Кайман" вытворчасці ААТ "140-вы рамонтны завод" (Барысаў) намечаны на люты-сакавік. Аб гэтым паведаміў журналістам начальнік аддзела маркетынгу прадпрыемства Віталь Забела на выставе распрацовак і ўзораў прадукцыі арганізацый Дзяржаўнага ваенна-прамысловага камітэта Беларусі, якая прайшла ў Мінску ў рамках калегіі ДВПК.

Паводле слоў Забелы, раней прадпрыемства ў ініцыятыўным парадку правяло ўласныя выпрабаванні, каб пераканацца ў заяўленых характарыстыках аўтамабіля.

"Кайман" прызначаны для выкарыстання ў якасці транспартнага сродку пры вядзенні разведвальных і дыверсійных аперацый, патруляванні і суправаджэнні калон, правядзенні міратворчых і паліцэйскіх аперацый, вядзенні дзеянняў ва ўмовах надзвычайных сітуацый.

Як паведаміў Віталь Забела, на выставе ўзбраенняў Milex у Мінску ў маі гэтага года "Кайман" будзе прадстаўлены ў пяці варыянтах — з розным узбраеннем і наборам опцый для выканання розных задач.

"Кайман" мае ўзмоцненае супрацьміннае часткова V-падобнае дно і агульнае браніраванне, якое адпавядае класу абароны Бр4 па ДАСТ Р 50963. Пры гэтым у лабавой праекцыі браня мае клас абароны Бр5, што перавышае клас абароны БТР-80.

У якасці асноўнай сілавой устаноўкі на "Каймане" выкарыстоўваецца дызельны рухавік Д-245 магутнасцю 170 к.с. вытворчасці ААТ "Кіруючая кампанія холдынгу "Мінскі маторны завод", спалучаны з пяціступенчатай узмоцненай механічнай каробкай перадач. Ён дазваляе машыне, якая важыць больш за сем тон, разганяцца па шашы да 100 км/гадз і пераадольваць на адной запраўцы да 1.000 км.

Адна з асноўных пераваг "Каймана" перад колавымі аналагамі — магчымасць пераадолення ўплаў водных перашкод і наяўнасць вадамётнага рухавіка. Канкурэнты здольныя без папярэдняй падрыхтоўкі пераадольваць водныя перашкоды толькі ўброд, глыбінёй не больш за 100—120 см.

У залежнасці ад запатрабаванасці вырабу і рэгіёну пастаўкі прадугледжана магчымасць мадэрнізацыі вырабу, у тым ліку змена віду ўзбраення, фільтравентыляцыйнай устаноўкі, устаноўка сістэмы кандыцыянавання паветра, замена сродкаў сувязі і г.д.

Вячаслаў Будкевіч
БелаПАН, 27 студзеня 2017