Генеральная пракуратура Беларусі распачала справу ў дачыненні да былога намесніка генеральнага дырэктара мінскага машынабудаўнічага прадпрыемства па ч. 3 арт. 424 КК (злоўжыванне ўладай ці службовымі паўнамоцтвамі).

Ва ўпраўленне па барацьбе з эканамічнымі злачынствамі паступіла інфармацыя аб злоўжыванні службовымі паўнамоцтвамі былым намеснікам генеральнага дырэктара па камерцыйных пытаннях мінскага машынабудаўнічага прадпрыемства. Аператыўнікі УБЭЗ арганізавалі праверку звестак, што да іх паступілі, і яны пасля пацвердзіліся.

Аказалася, што былы намеснік гендырэктара, ведаючы пра неплацежаздольнасць контрагента, даў указанне ажыццяўляць адгрузку аўтамабільнай тэхнікі ў яго адрас, што пацягнула ўтварэнне дэбіторскай запазычанасці — 250 млрд. рублёў. Вяртанне названай сумы цяпер знаходзіцца пад вялікім пытаннем.

Падазрэнні выклікалі фінансавыя адносіны мінскага машынабудаўнічага ААТ з украінскім ТАА, паміж якімі быў заключаны дагавор на пастаўку тавару. Згодна з ім пастаўка павінна была ажыццяўляцца пасля давання пакупніком безадзыўнай банкаўскай гарантыі. Але з прычыны пэўных умоў прадпрыемству далі адтэрміноўку — 15 дзён (ініцыятарам гэтага выступіў былы намеснік гендырэктара). Аднак па заканчэнні пазначанага тэрміну контрагент мінскага прадпрыемства так і не даў банкаўскай гарантыі, але, нягледзячы на гэта, адгрузкі тавару ўкраінскаму ТАА працягваліся яшчэ тройчы.

"Такія дзеянні пацягнулі за сабой павелічэнне дэбіторскай запазычанасці, — падкрэсліў начальнік УБЭЗ КМ ГУУС Генадзь Казакевіч. — Улічваючы сумнеўную плацежаздольнасць пакупніка, гэта прывяло да адчувальнага пагаршэння фінансавага становішча беларускага ААТ".

Вячаслаў Будкевіч, БелаПАН
Мінск, 15 лютага 2016