Пасля набыцця беларускіх тавараў народнага спажывання 63 працэнты замежных грамадзян канстатавалі іх высокую якасць. 

У апытанні прынялі ўдзел 724 чалавекі з Літвы, Латвіі, Эстоніі, Фінляндыі, Польшчы і Германіі. «Грамадзяне краін Еўрасаюза, якія пры наведванні Беларусі набылі тавары мясцовай вытворчасці, адзначылі, што беларускія тавары маюць высокую якасць», — заяўляе агенцтва.

У першую чаргу замежным грамадзянам спадабаліся прадукты харчавання — малочныя, мясныя і хлебабулачныя вырабы, сокі, алкагольныя напіткі, мінеральныя воды, піва. Таксама адзначаны тавары ювелірных заводаў, абутковых фабрык, касметыка і бытавая хімія, калготкі і панчохі, бытавая тэхніка (у прыватнасці халадзільнікі і пральныя машыны), плітка і сантэхніка. Рэспандэнты падкрэсліваюць натуральнасць, калі размова ідзе аб прадуктах харчавання або касметыцы.

На думку старшыні праўлення групы рэкламных агенцтваў AD Hunters Baltics, эксперта па маркетынгу і грамадскіх адносінах краін Балтыі Кястуціса Ісакаса, часта беларускім таварам не хапае маркетынгу і рэкламы, каб яны былі выгадна прадстаўлены менеджарам гандлёвых сетак і канчатковым спажыўцам. «Гэта звязана і з тым, што ў краінах Еўрасаюза інфармацыя аб Беларусі ў цэлым падаецца даволі аднабока і часта гаворыцца толькі аб яе праблемах, але не аб поспехах. Экспартны патэнцыял прадпрыемстваў Беларусі вельмі вялікі, але фактычна ён не выкарыстоўваецца належным чынам», — лічыць ён.

Hunters Communications group — міжнародная група агенцтваў маркетынгу і камунікацый, якая працуе ў Латвіі, Літве, Беларусі, Расіі і Эстоніі. Яна была створана ў 1993 годзе.

Звязда, 5 траўня 2015