"Апошнім часам я ўсё часцей чую: ах, расійскі рубель абваліўся! А там 40% нашага экспарту, і мы нясем страты. Але што рабіць, такі ў нас сёння партнёр і такая сітуацыя ў Расіі і ва Украіне — гэта таксама наш партнёр. Але бязвыхаднай сітуацыі няма. Калі дзесьці штосьці губляем, то трэба знаходзіць у іншым месцы", — цытуе Лукашэнку дзяржаўнае агенцтва БелТА.
Ён, у прыватнасці, указаў на неабходнасць скарачэння сабекошту. "Пакуль жывем на шырокую нагу, жыруем і думаем. што так будзе і далей. Не, трэба напружвацца. Мяне ва ўрадзе штодзённа інфармуюць ад харчаванні — няма праблем са спажыўцамі ў Расіі па аплаце ў рублях. Абваліўся рубель да 70 за адзін долар — мы такую цану і закладваем. Мы працуем па перадаплаце, правільна, так і павінна быць. Іншага не дадзена", — заявіў Лукашэнка.
Ён паставіў перад урадам задачу гандляваць не за расійскія рублі, а за долары ЗША. "Паколькі мы плацім за электраэнергію не ў рублях, а ў доларах, — падкрэсліў Лукашэнка. — Гэта, дарэчы, недахоп у працы ўрада Расіі: трэба было даўно працаваць і патрабаваць з іх, каб яны нам таксама плацілі ў цвёрдай валюце, у доларах і еўра. Мяне інфармуе ўрад, што лёд крануўся, пакупнікі нашай прадукцыі ў Расіі плацяць у доларах. Калі ў рублях — то ў адпаведнасці з курсам на сёння".
"Скардзіцца на сітуацыю няма сэнсу, мы дамовіліся — у любой сітуацыі павінны жыць і працаваць, іншага не дадзена", — сказаў Лукашэнка.
Ён сцвярджае, што ў краіне няма праблем з працай прадпрыемстваў. "Яны могуць выпускаць неблагую прадукцыю па прымальных цэнах. Пытанне ў продажы гэтай прадукцыі за межы краіны, — лічыць Лукашэнка. — Прададзім больш — больш валюты будзе. Тады і ўсялякія размовы пра валютны крызіс у Расіі, абвал будуць проста пустымі. Усе залежыць ад нас. Экспарт — пытанне нумар першы".
Ён таксама заявіў, што Беларусь не будзе бегчы за Расіяй і дэвальваваць нацыянальны рубель. "Нікога не хачу здзівіць, пазіцыя застаецца ранейшай. мы не збіраемся бегчы за Расіяй, гэта катэгарычна забараняецца, таму што расійскі рынак — не зразумела, што там, хто што хоча і што там будзе", — сказаў Лукашэнка.
Паводле яго слоў, "ваганні на расійскім валютным рынку не паддаюцца ніякаму асэнсаванню". Дэвальваваць валюту на гэтым фоне непрымальна, заявіў Лукашэнка. "У нас ёсць абавязацельствы перад насельніцтвам, і мы іх павінны прытрымлівацца, што, як мяне інфармуюць урад і Нацыянальны банк, і робіцца", — дадаў кіраўнік дзяржавы.
Ён звярнуў увагу на тое, што стабільнасць на валютным рынку — гэта абавязак банкаўскай сістэмы на чале з Нацбанкам і ўрадам, усё астатняе — у руках насельніцтва.
"Хочаце абвалу — бегайце па абменніках, гэта ўсё ў руках грамадзян нашай краіны. Ківаць на кіраўніцтва, на ўрад, на Нацыянальны банк сёння непрымальна", — заявіў Лукашэнка. Пры гэтым ён запэўніў: для забеспячэння стабільнасці ўлады будуць выкарыстоўваць усе магчымыя рычагі, але — "не парушаючы ніякіх фінансава-эканамічных законаў".
