Перамовы пра гэта адбыліся 17—18 красавіка ў нямецкай сталіцы падчас візіту беларускай дэлегацыі на чале з намеснікам міністра замежных спраў Аленай Купчыной.
Як паведамляе прэс-служба МЗС Беларусі, прайшлі перамовы дэлегацыі ў федэральным МЗС Германіі, Міністэрстве эканомікі і тэхналогій, Германскім саюзе гандлёва-прамысловых палат, з дэпутатамі бундэстага. Бакі абмеркавалі ход выканання дамоўленасцяў, дасягнутых падчас пасяджэння беларуска-германскай працоўнай групы па справах гандлю і інвестыцый, якое адбылося ў Мінску 21 сакавіка.
Падчас візіту беларуская дэлегацыя ўзяла ўдзел у міжнароднай канферэнцыі East Forum Berlin 2013, на якой прысутнічалі члены ўрадаў краін Цэнтральнай і Усходняй Еўропы, кіраўніцтва МЗС Германіі і шэрагу ўрадавых устаноў краіны, прадстаўнікі Еўракамісіі і найбуйнейшых нямецкіх канцэрнаў, фінансавых інстытутаў, асацыяцый прадпрымальнікаў і ўстаноў па падтрымцы развіцця бізнесу.
На канферэнцыі былі ўзнятыя такія пытанні, як уплыў пазыковага крызісу Еўрасаюза на эканомікі ўсходніх краін — суседзяў ЕС, перспектывы зон свабоднага гандлю, шанцы і рызыкі, звязаныя з магчымым стварэннем агульнай эканамічнай прасторы ад Лісабона да Уладзівастока, канкрэтызавалі ў прэс-службе беларускага міністэрства.
Адзначаецца, што Алена Купчына ўдзельнічала ў дыскусіі форуму на тэму: "Еўрапейскі саюз, Усходняе партнёрства, Еўразійскі саюз — выклікі і магчымасці пагадненняў аб свабодным гандлі і эканамічнай гарманізацыі".
Захар Шчарбакоў,
БелаПАНМінск, 20 красавіка 2013
